佛欲救咱

昨，拜五，我下晡五點半下班就趕去天主教病院安寧病房助念。暗頭仔11點半，閣去街內共久病自殺一位婦人人助念。阮助念團今仔日攏總共四位往生者助念，一位是虎尾墾地仔，助念團排7班30個人，念7點鐘10分鐘。一位是斗南庄跤，排2班10個人，念2點鐘。一位是安寧病房助念，排8班37個人，念8點鐘。一位是街內，排3班13個人，念3點半鐘。四位攏是女眾病者，其中一位是癌症，年紀上少63歲，上濟89歲。助念團無收紅包，助念的對象無限，肯接受念佛做伙念佛就可以。 

念佛、助念，特別將道證法師開示的「佛要救你」，其中一小部分譯做台文分享有緣。 

佛號—是佛予咱的金剛鑽！

—是佛「大力」的全體展現！ 

有一寡人會認為「家己功夫無夠好，念佛敢有效？」用按呢的心思去幫人助念，一定未得力。」咱愛了解一粒寶珠，誰提攏是寶珠，鑽石誰來掛攏是鑽石，共款道理，佛號無分—誰念的就有效，誰念的就無路用。毋捌（不識）貨的人，才會認為－散鄉人（窮人）掛的毋是鑽石。

若是深入佛心的人就會了解：「就是因為我是一個完全無功夫的散鄉人，佛毋才共上寶貴的鑽石留予我。」這是佛心啊！

 所以彌陀要解講：「一聲阿彌陀佛，即釋迦本師於五濁惡世，所得之阿耨多羅三藐三菩提法，今以此果覺，全體授與濁惡眾生，乃諸佛所行境界。」

佛將伊所有成佛的果實，果覺的全體，攏無條件送予咱五濁惡世的眾生，這款的心境，只有佛佮佛互相之間才會究盡了解，所以愛解講：「唯佛與佛能究盡，非九界自力所能信解也。」這款的心境只有佛佮佛才究盡了解，毋是九法界（包括等覺菩薩）眾生用「自力」就會當相信了解。

咱深入佛的這份心，愛發願學伊的模樣，而且恭敬感恩將佛送的這粒鑽石提出來用，免歹勢。佛絕未因為我是一個無功夫的散人，伊就予我一寡凊飯、凊菜，或者是假鑽石。佛攏是將伊缽內上甜上芳的飯，留予我這個散甲無半項的人。我既然一點仔功夫都無，就是散疕疕，毋過，我提出來的是佛予我的鑽石！「南無阿彌陀佛」這句佛號就是佛予我的鑽石，價值勝過三千大千世界！我家己雖然未曉救苦救難，但是我知影——阿彌陀佛蓮池海會，怹是「打電話服務就到」，這個「知影」是非常重要！絕對未使毋知影哦！比如講：咱家己未曉救火，毋過「知影」打「一一九」就好勢啊！

鑽石雖然是寶物，但是對毋識貨、無相信伊是鑽石的人來講，伊的光度著算一點都無減少，嘛無辦法去換著真懸（很高）的價數（價格）。毋是無法度去兌換，是無相信、毋識貨的人毋敢、嘛未曉去兌換；所以，這鑽石的強度、硬度、亮度雖然一點仔都無差，但是因為「未曉用」，結果就連玻璃都無辦法度來割！這句阿彌陀佛的名號也是共款，如果汝捌貨有信心，就有一切用，一切用攏具足！ 

接受佛的慈悲（大願救度）

    ——木材點著火（以深信願，持佛名號）

如果咱家己已經信受佛的大願，內心有信、有願，眾生接受了佛的大願，就好像木材點著火共款，柴佮火就是一體的，是完全未當分割的，木材到佗位，火就到佗位！所以心中接受了佛的大願——將佛的大願，融佇咱內心，按呢每一聲的阿彌陀佛，都是佛精神的全體展現，所以蕅益大師講：「持一聲，則一聲無可思議」，「持十百千萬、無量無數聲，聲聲皆無可思議也」。

因為你柴到位，阿彌陀佛的火就到位啊！這一聲阿彌陀佛，單單這一聲，就是阿彌陀佛久遠大劫大願、大行、大慈悲的展現，而且是無任何落交（脫落）全部展現的！這一句佛號毋是普普通通的一句話，這是全法界褿震動的一句話！就是全法界攏起嚴肅恭敬的一句話！因為，所有阿彌陀佛累世以來上山落海救咱的心願，攏佇遐，佛為了全法界眾生，所流的血佮目屎攏流踮彼搭，所有一切呵咾曱會觸舌的菩薩行，攏融攝佇內面。全法界的佛攏為伊大聲贊歎，這一聲阿彌陀佛，從咱「小小的一念心」生起來，就像海湧一湧一湧傳遍全法界，發起全法界的力量！

所以毋通看輕這一聲稱念，毋通看輕會用得念佛的這一念心，伊就是全體法界，毋通看輕所念的這一聲佛號（要解講：全攝佛功德成自功德，要解講：稱名善根福德同佛故，而且是「當下圓明，無餘無欠。」

所以咱隨時就愛真珍惜這一念萬德洪名，這是出生死寶貴的竹排仔！內心愛領受「全法界的大力」來念，而且恭敬這一念「佛」！

因為佛的慈悲是平等無差別的，干礁（只要）真誠專注，誰念攏是共款有效，有的人會講：「請師父來念比較較有效，我無啥乜（什麼）功夫，念起來無啥效！」按呢想，「信願」就有問題，毋但無「自信」——信自性佛力，「對佛的認識」嘛有問題。（奚是邪知邪見啊！）等於是懷疑佛的慈悲平等。

是佛慈悲有神通，非我有功夫！

愛了解咱念佛感佛來應，奚毋是咱功夫好哦！是因為佛有大勢力、大慈悲、大神通，佛知影咱咧念伊，咱咧向伊求助，所以伊慈悲趕緊應咱！這是佛的神通，逐家未用得悾歁（莽撞），貢高我慢，以為是家己功夫好——「真會念佛」，所以佛才來應，（如果真的是靠家己的功夫，應該念家己的名字就好，毋免念佛名！）