火燒罟寮全無望，擔沙填海了戇工

「火燒罟寮全無望，擔沙填海了戇工」，是無奈，無望，去了了，怨嘆無彩工的意思。

 
「火燒罟寮全無望」，是形容走投無路，悲觀絕望全無希望的意思。罟是魚網仔。罟寮：是漁民做伙貯囥魚網的草寮。有人念毋著，一丈差九尺，念做「菇寮」。

 
收囥罟寮底的魚網參罟寮做伙攏予火燒去，倚靠魚網仔來討海掠魚維持生活的向望攏總烏有（泡湯）去了了，真正是悽慘！「無網」與「無望」共音，夆借來指講無希望。

 
「擔沙填海了戇工」，用沙填沙，沙一擔一擔擔來填，海湧一來沖甲無了了，枉費心機－白費神，指無彩工、白了工的意思。「擔沙填海了戇工」，嘛有講做「擔山填海了戇工」。

戇，念「gong7」，無聰明、條直的意思。戇神（失神、一臉茫然），戇猴（傻瓜），戇豬（有錢的傻瓜），賣戇肉（討打），戇入無戇出（喻私利心重），戇甲無尾（愚不可及），戇蠓釘神明（不痛不癢）。 

 憨，華語念「ㄏㄢ」，台語念「gam7音癌」，癡呆、無聰明的意思。用詞：憨人（傻瓜），憨目（眼力鈍），憨面（厚面皮、不慧），憨頭憨面（膽大妄為），憨賊（冒冒失失的賊），憨面想（非分之想），憨憨（不聰明）。憨，文讀音念「am音庵」，另外嘛有人念「ham音蚶」。

類似的俗語：
(1)貓仔袋落布袋－無望。(2) 青暝仔放粉鳥－無望。
(3)寡婦死囝－無望。(4)牽豬哥扑毋見錢－無彩滫。
(5)牛屎龜叮石板－無彩工。(6)擔柴入內山－無彩工。
(7)狗吠火車沒－無彩工。(8)戇猴搬石頭－無彩工。