母喪安神藥帖-伊呀已經行遠去

伊呀¹西方去，雖是到佛國，無奈心內悲，想欲勇敢放予離，目屎毋願滴！毋是放袂²落去，毋是對佛慈接引有懷疑，只是，從今以後看袂著伊，伊燒燒的手袂閣牽著阮冷冷的手枝，袂閣聽著慈祥溫柔關心我的話語！我知影你已經行遠去，你嘛袂閣歡歡喜喜陪伴佇阮的身邊！到今，我才知了解「悲傷」叫啥物³，「失落」是怎樣的稀微，好親像無你，我就活袂落去，我毋知活落去到底閣有啥意義。   

這種的痛苦真複雜，無底通講起。氣，氣我家己袂當有好跤⁴好手照顧伊，氣我激無一點仔氣力，會當安慰伊身心亦苦亦憂的交纏。行到欲斷氣，猶是對我操心到按呢生，人講人生無不散的宴席，愛有勇氣面對佮^５支理。這款的道理我知機，只是親情的斷離，對我來講，袂輸失魂去，慈恩袂報，勇氣變做受氣我家己，足想欲綴⁶你去，早暗通好伺候你。　　

乖囡咧，自古以來生離死別是人生的大戲，衰老的身軀借我用甲遐濟⁷年，敢講免予歇睏，就愛拖磨甲賰⁸無一个氣絲，悾悾戇戇倒佇病床咧開錢。乖囡咧，我嘛知你是毋甘，毋甘的目屎你閣賭強吞落來。吞落來的目屎你並無消化，變成千斤重，硩甲你的情緒身體欲崩去！請你仙毋通，欲哭你就勇敢哭出來，哭，才會消透你滿腹的愁懷。時間一工一工過，慢慢就會消納彼分牽腸割肚的疼！看你化袂開，人神神，家庭生活亂廢廢．伊呀敢袂心搐，敢會安寧！你愛學會曉寶惜家己，毋通因為你化袂開，變成伊呀的拖累！ 

乖囡咧，死，雖然袂當閣相見，思念總是會當隨時囥佇你身邊，彼是上溫暖、上純情的記持。無呢，你看著的是面仔骨骨憂愁的面容，瘦枝落葉⁹破糊糊的老機器。活，袂快活，死，袂斷氣，這叫做「酷刑」，這叫做「凌遲¹⁰」！你敢愛伊呀受這款的拖磨，按呢接紲¹¹落去。伊呀是借生老病死的苦來教你，共你講刻骨刻肉「世間是苦」的道理！因為「無常」，不得不愛參所愛的人分離，姑不將攏會拄著無佮意的代誌，咱所求的無法度全部照咱的意，擁有的也會拍無去，悲憂苦惱是四常發生的代誌，這，攏是世間的真理，足自然的道理！ 

乖囡咧，親人分離會悲傷是當然的代誌，有生有死嘛是性命的傳奇，死是大自然的公平佮慈悲，無死的人生有啥好趣味！死，毋是毀滅，毋是烏有，是重頭生！既然欲去「生」，像一台破車害朽朽，閣換新車繼續跑、繼續來去，何用悲傷來讚美！尤其是，病苦袂醫得，死，顛倒是一種解脫，一種卸了重擔的秋凊¹²，會當好禮仔歇睏，是天福毋是不幸，你那著面憂憂心肝拍結毬¹³。愛知：過度的悲傷並無代表才是愛伊，真情的數念毋免用悲傷來觸纏¹⁴。悲傷像一蜷¹⁵索仔，愛沓沓仔¹⁶一條一條來敨¹⁷，用時間勻勻仔¹⁸來治療。 

喪親之疼，好像心肝雄雄夆¹⁹裂做兩爿²⁰。予悲傷自然流露出來，莫共壓制。喪親的悲傷是正常的，毋過愛共內心的悲傷講出來，毋通孤孤單單一人咧悲傷，毋通拒絕別人的關心佮協助。接受死亡的事實，慎重對亡者告別佮祝福，靈前稟告、寫批、寫文章、誦經念佛……。逐工固定一點仔時間想伊呀，其他的時間就專心做你的工課。慢慢固定時間彼一點點仔的悲傷，嘛會慢慢仔薄去。 

愛知，悲傷是會當停止的，過度的傷心並無意義，你愛想按怎做才是亡者上歡喜的，伊敢愛你閣遐呢過度悲傷！悲傷，有時一段時間會閣浮起來，有時悲傷是無遐緊就會消除。暴風雨過了，愛回復本底現實的生活世界。結束悲傷，並毋是抹銷對伊的愛或者是思念，而是接受已經往生的事實，愛伊的心並無改變，伊的風采照舊，咱永遠敬愛伊。 

失去伊呀，咱猶有濟濟無失去的，更加愛去珍惜。伊呀一定向望你，歡歡喜喜平安過日子，照顧予好家己，照顧厝內的人，照顧你年老無老伴的阿爸。這久，你彼款無神彩的範勢²¹，自身就難保，甭講其他！這久，上重要的是愛振作，愛看開，看開死亡佮無常的真理，體會伊呀死亡留予咱的意義。猶有，阿爸需要你歡歡喜喜安慰伊，將你體會的道理帶予阿爸平安行落去！    （2010.10.08.寫予好朋友茄仔色）

註釋：

1.伊呀：母親。

2.袂：bē/buē，不。否定詞。例：袂曉(不會)、袂講得(說不得)。

3.啥物：siánn-mih，什麼。

4.跤：kha，腿、足。例：跤尖手幼 (手細腳細，形容讀書人的樣子。)

5.佮：kah，和、及、與、跟。

6.綴：tuè/tè，跟、隨。

7.遐濟：hiah-tsē/tsuē，那麼多。

8.賰：tshun，剩餘。

9.瘦枝落葉：形容身體枯槁消瘦。

10.凌遲：lîng-tî，受到極殘酷的手段的虐待、凌虐。

11.接紲：tsiap -suà接續不斷。

12.秋凊：tshiu-tshìn，涼爽。清涼舒爽。

13.拍結毬：phah-kat-kiû，心情鬱悶不解。

14.觸纏：tak -tînn，糾纏。

15.蜷：khûn，計算纏繞成圈狀物的單位。

16.沓沓仔：ta̍uh-ta̍uh-á，慢慢地。

17.敨：tháu，解開。

18.勻勻仔：ûn-ûn-á，慢慢地、謹慎小心地。

19.夆：Hông，台語予人hōo- lâng的合意，讓……。

20.爿：pîng，邊。表示所在位置。

21.範勢：pān-sè，情況、態勢。事務的實際狀況。