為何欲退休 

公務員任職5年以上年滿60歲者或是任職滿25年者，會使自願退休。我選佇滿55歲前退休主要是感覺這一、二年來的體力、精神加足較差，恐驚做未好空課，尤其做一個科室主管對家已的業務，發覺閣較拍拚也是無進步的空間，無彼種動力佮熱情。高層喙講的攏是足注重這第一線的服務台，認為這是行政機關的門面，這若做了好，會減少真濟對機關的怨言，做了好對機關的服務形象有真大的影響。毋過從來毋捌無用心這的空課，只要你甭出代誌就好。極加是家已機關的首長本身有認捌，有好的政策來實踐，可惜十外冬干旦拄著一个爾爾。

    會選佇滿55歲的8月1日退休，是滿55歲提前退休，會當加領一擺加發5個基數的退休金。金錢的引誘是一項，主要是感嘆人生太無常，誰知我的性命閣會當活偌久？序細大漢，撫養的責任已了，留予家己一段免「食人飯，犯人問（華語叫為五斗米折腰）」的清閒日子，算算咧退休金總數平均逐個月領的錢比這久有較濟。

    真濟人問退休欲做啥？退休就是退休，那著閣做啥。有人閣找第二春領雙薪，錢有夠用就好，我無這款大心肝。有人閣去做義工或者做興趣的代誌，我的規畫是：第一運動顧身體，第二看冊（冊買足濟等我看），第三台文寫作，第四練毛筆字，第五遊山玩水，其次是助念、公益的空課。

    有主管問我欲作調解委員無？我應講：「甭咧」，奚毋是我的興趣，雖然調解委員有領公費，足濟人咧爭取。掠做有人問我講：「閣轉來做訴訟輔導的志工好否？」亦是「甭」較好！足驚接任的人毋認真，將個案推捒予我，閣講法律的問題有時真複雜，法令參實務的見解、做法定定咧變，服務是專業的，我無愛用較濟的心神佇遐。無咧，有朋友講：找一間律師事務所來掛牌，挺好閣趁一寡細條，大條的引予律師做。我想敢著赫辛苦！自底有想退休了後，會使一禮拜找一工去一位女立委的服務處幫忙，可惜伊連任失敗，服務處嘛收起來，規劃欲達成，愛機緣！

    退休是政府對公務人員任內認真付出的鼓勵，阮感恩接納，會當平安退休是真正的福氣，退休了後會當安享老年生活，更加是福氣，阮會歡喜珍惜。

圖片是澎湖中屯風車的綠能源公園雕塑..孕育