網路城邦
RSS Feed Link 部落格聯播

文章數:191
粞粽【tshè-chàng】(台語文)〔感謝電小二6/22推薦〕
創作散文 2012/03/20 15:18:55

阿爸別世未對年,清明祭拜趕進前。

小弟仔阿維講阿爸在生的時愛食粞粽,咱就用粞粽來敬阿爸。

粞粽、佇菜市仔我抑毋捌看過有人咧賣。

粞粽當然是愛家己來縛矣。

成十工前阿維就通知我,39欲來阮兜縛粞粽,我較無方便,伊干單分配我買土豆來舂【tsing】,佮負責買做餡【ānn】的豬肉。

縛粞粽較厚工,需要的傢私嘛袂少。

阿維叫我附近問看有人咧共人挨粿否?若有、就免共厝裡伊呀以早咧用彼台挨粿機送過來。

去問賣碗粿的;伊講怹碗粿挨了洗清氣就無欲閣用挨粿機矣。

去問菜市仔咧賣鼠麴粿的阿桑;伊講怹兜的挨粿機挨家己的爾,毋捌共人挨粿。

閣去問拺【sak】菜頭粿出來賣的頭家娘;伊講怹蹛真遠,叫我附近揣看咧。

我無閣揣。看這咧扮勢是問無矣。

過無幾工,阿維轉去現此時已經無人咧蹛的厝裡,共彼台挨粿機用貨運寄過來。

怹來彼工,阿維載來做粿需要的傢私:nuá粿的kam-bôo、共米漿矺【teh】離水的椅條、粿袋仔、炊粞粽的爐仔佮籠sng5【蒸籠】,連縛佇椅條予米漿離水彼條粗閣勇的草索仔,伊嘛紮過來。.....大項細項載一車。看著熟悉的物件、想起阿爸佮阿娘,對親情的思念、深深牽掛。

二姐怹兜兩棟相連的樓仔厝,樓跤樓頂闊闊闊,少人蹛、外家兜嘛有兩層樓通利用,攏評我遮較有轉踅的跤路,是按怎欲來阮兜縛粽?

阿維講:汝是悾的哦?咱若佇別位縛粽,汝愛盤山過嶺開車去,就是無愛予汝費氣毋才來恁兜。

阿維講話本來就káu怪,紲落問講:按怎、汝無愛夆來哦?

戇小弟,汝加問的、我哪會無愛人來咧?

只是足歹勢,這半個月來搪著翁婿阿勳身體無sù-sī,傱出傱入載伊看醫生,又閣定定搪著落雨天,出入無方便的我,負責愛攢【tshuân】的料一項都無買,一直到怹欲來的前一暝,才去kám仔店買兩斤土豆,日時上班、暗時想欲舂【tsing】土豆,驚吵著身體無爽快的阿勳,所以怹來到阮厝的時,我攏亦未動工,連欲做餡的豬肉嘛抑未買。只好載二姐去黃昏市仔,我無方便入去,予二姐家己入去買。二姐買好出來的時共我講:伊問頭一擔豬砧,問怹的豬是食飼料抑是食phun【餿水】的?豬砧的頭家娘像食著銃子,大聲應二姐講:恁總統敢欲予汝食puun?敢欲予汝食puun....啊~予阮食潘?哪會按呢?問一下飼phun抑是食飼料的問題有遮嚴重嗎?

二姐講這擔豬肉偆真濟,毋拘看伊歹衝衝的態度,趕緊離開,去交關另外一擔。

我該攢的無攢甲夠,共怹講歹勢。怹當然是體諒我的啦。大姐、二姐一人舂一睏仔,就共餡的主角──土豆麩舂好勢矣。

二姐講,以早若欲縛粞粽,伊呀佇幾何工前就逗逗仔攢,一工做一屑仔。舂土豆、洗粽hâ-á、傢私洗tng7等等。

是啦,伊呀在生時,阮是偌呢仔幸福啊。到縛粽彼工,蹛外家附近的大姐佮阿維、佮真爻做空課的二姐攏會轉去鬥相共。我時間若會拄好才有轉去,其實就算我有轉去,我會曉做的空課嘛無濟,總是鬥鬧熱爾爾。

無伊呀看頭看尾,佳哉二姐有伊呀的扮勢。彼暗伊就共hâ-á用燒水浸予軟,一葉一葉洗清氣、豬肉洗清氣囥佇冷凍冰予略略仔碇,伊講按呢較好切細塊、攢料過程有疑問的時,阮會像伊呀閣佇身邊按呢問:伊呀、按呢著否?

材料是二姐款的、伊記持好嘛較捷轉厝裡鬥做,伊講若像阿爸有咧看伊攢,本成米已經買好矣,伊去朋友兜拄好有人咧炊菜頭粿,講起縛粞粽的米,才知影伊買毋著、重買。

續落、我就大約寫縛粞粽的過程。

材料:長秫仔三斤、圓秫仔三斤、蓬萊米三斤、粽hâ-á四把、粽綰十綰、紅葱頭大約一斤、胡椒粉一罐、土豆兩斤、香菇一小包(無問重量)、豬肉兩斤、冬蝦大約半斤....其它配鹹汫的料油、鹽、豆油、等等。

米浸三點鐘以上挨囥落下挨粿機挨,承佇粿袋仔內底,袋仔喙縛拫【ân】囥佇椅條,頂頭khe3一支較勇的棍仔用草索仔摧拫,予粿漿離水變粿粞。無偌久愛敨開重縛閣摧一改索仔,重複幾何擺,囥咧滴水。

前一暗二姐就先共粽餡炒起來。

炒粽餡的過程是按呢:紅葱頭先糋【tsìnn】起來、香菇、土豆麩、豬肉一項一項分開炒予熟、攏炒好共料敆做伙囥予冷。

第二工早起就開始縛粞粽。

代先捻【liàm】寡仔粿粞用一屑仔油煎做粿餔【pôo】,(嘛會使用煮的),我毋知影用煮的佮用煎的有啥無仝。煎好的粿餔參佇粿粞撋【nuá】予khiū,而且撋愈久愈khiū,撋粿是粗重空課,干單二姐佮阿維有才調做爾;大姐無力撋,我袂曉徛閣較無可能有氣力撋粿。

粿粞撋好,開始縛粞粽矣。

阿勳開始幫忙有鬥幫忙共粿粞搓一粒一粒予二姐包餡、大姐縛粽。阿姐問阿勳有食過粞粽否?阿勳講伊袂記得矣。大姐足確定講阿勳一定食過。

無要緊,等咧伊就會想起來矣。

阿勳彼幾工仔身體無好勢,鬥做無偌久講頭榖又閣有略略仔無爽快,就予伊歇睏。

 

會記得參伊呀咧縛粞粽的時,伊總是三叮嚀、四交代:毋好儉油哦。

厚油,才袂予粞粽kiap著粽hâ-á,所以縛粞粽愛用真厚的油來分離。哪縛、阿姐怹學伊呀的口氣講:油毋好儉哦!

在來縛粞粽的時攏是買純的土豆油來抺。市內有一間油店,父母在生的時食會合,三不五時我唯遮會寄土豆油轉去予父母煮食。這工我去買油的時,頭家娘問我哪會遐久無去怹店買油?我講以早是買予父母才較捷來,今父母都無佇咧矣.....

頭家娘講人就是按呢,講走就走。

我想、伊有一半是咧講伊家己的翁婿吧?怹頭家嘛是舊年無去的。

買一下土豆油,都充滿對父母的思念,咧縛粞粽的時,抑是有講袂了的往事。

大姐平時仔看起來軟汫軟汫,這工伊一點仔都無軟汫,是真正有大姐的肩胛。攏總縛八綰、百外粒的粞粽,每一粒攏經過大姐手,縛著緊閣嫷,伊彼个粽索仔縛活結,是我仙學仙袂來的技術。伊講以早佇厝裡攏是伊咧縛。莫怪跤手遮猛掠。看起來,阮後擺毋好閣講伊軟汫的大姐矣。

阿維起火焚水;若是佇外家炊粿,阮兜是用柴焚火來炊粿的。

阿爸佇五樓做一个焚柴的灶,阿爸以早若出去散步行路,會順紲抾一寡仔柴箍轉來,阿爸講即馬的人足討債,以前欲焚火就愛到山裡抾柴,即馬柴箍鎮甲滿四界。阿爸柴箍抾轉來,就用柴刀phuà予長短整齊整齊,囥佇灶邊一堆一堆,較好的柴阿爸攏會毋甘焚。二姐講阿爸過身了後,看著彼堆柴,足想欲共焚掉.....

佇阮遮,無灶、所以用瓦斯火炊粽。

粽綰落鼎炊啊炊,芳味出來矣。阿勳鼻著芳味講:我知矣,我有食過。

我就知、芳味會叫醒人的記持。

就是講咩,做阮兜的子婿二十外年,哪有可能無食過阮兜這呢好滋味的粞粽?因為阿爸上疼我,每一擺外家若有做粿縛粽,無論我有轉去抑是無轉去鬥跤手,阿爸總會佇炊好囥冷的時就叫阿維緊包裝用黑貓寄來予我食。

粞粽起鼎囥予略略仔冷上好食。

敁開粞粽鼻芳芳,食頭一喙忍不住喝一聲:伊呀、足好食的呢。

這粞粽的味、參伊呀縛的粞粽一點仔都無精差。

阿姐、恁哪會遮爻?

二姐講:那縛粞粽那想父母,認真回想其實毋是毌甘、是自覺虧欠才會艱苦心。

唉!二姐照顧父母遐爾仔用心、出力,都會感覺虧欠矣;無講是我。予人疼愛上濟、付出上少,虧欠的心情,難免。毋拘父母一定毋甘咱一直沉佇虧欠的心境,我一直相信;另工佛國一定會閣參父母見面,佇未見著父母這時陣,謹記怹的教示,綴父母的跤步行。

怹一定真歡喜,咱縛出來的粞粽,參父母做遐爾仔好食共氣味;這是因為怹精神一直毋捌離開去。

 
電小二
等級:8
留言加入好友
2012/06/22 19:16 刪除 |回覆
Dear sann(33)(sann)

特前來恭喜您所發表「粞【tshè】粽(台語文)」一文,已經登上聯合新聞網首頁,生活天氣|貼心下午茶,歡迎有空前往觀看。^_^

非常謝謝您的好文分享,此推薦是利用轉址的方式連結到您的文章。如此文有原因不希望被推薦,請到電小二訪客簿留言,會盡快協助取下。

電小二

最新創作
平安,誠好!
2018/06/06 16:53:45 |瀏覽 83 回應 0 推薦 9 引用 0
貓仔囝
2018/06/06 16:48:27 |瀏覽 45 回應 0 推薦 5 引用 0
車內的傳教
2018/06/06 16:44:01 |瀏覽 23 回應 0 推薦 2 引用 0
透早的農路
2018/06/06 16:28:09 |瀏覽 42 回應 0 推薦 3 引用 0
懷念的方式...縛粞粽
2018/06/06 16:19:50 |瀏覽 17 回應 0 推薦 0 引用 0

最新影像 6361
不分類
不分類
不分類