*(演講稿)

欲按怎幫助別人？　                             

各位評判老師、各位同學，逐家好！我是第○號，今也日欲演講的題目是「欲按怎幫助別人？」          

         最近，電視有報一條新聞，講有一位阿伯，在公車頂要求一位坐佇博愛座的大學生讓位予伊坐，煞(suah4)予這位大學生拍到烏青激血，兩个人就告到警察局。看著這條新聞的時，我真正想無，讓座干焦是小小的舉手之勞，者爾簡單的一件事誌，為啥物這位大學生毋但(m7-na7 / nia7)做未到，甚至koh4出手傷人咧？反(huan2)過來問我家己，若是我拄著這情形，是毋是做會到咧？敢會有這款助人的心來讓位？我想答案是肯定的，我會讓位予阿伯坐！ 

　   有人講過「咱無法度用大愛去做大項事誌，毋過咱會當以小愛來做小事。」曷(ah8)是欲按怎來幫助別人？其實佇生活中，一寡順手就會當做的事誌，就是teh4幫助別人。親像紲(sua3)手抾(khioh4)土跤的紙屑(sap4)仔，按呢就減少清潔人員的負擔；佇公車頂扶老阿婆坐博愛座，或是主動讓出家己的位置予需要的人，按呢就是幫助別人；來講一个koh4較符合現在生活的議題－資源回收，若是咱肯認真來做好糞埽(pun3-so3)的分類，予收糞埽的人毋免koh4重新分類，毋但減輕著in1的工課負擔，對咱的地球也是一種保護。「勿以小善而不為」，就親像拄才所講的，干但是一寡沙沙屑屑，平常攏會發生的事誌，毋過咱若是順手小小的一个動作，攏會當予人感覺輕鬆koh4貼心，這就是我按怎幫助別人的理念。 

　　會記得(tit4)讀小學彼當陣，有一擺戶外教學的時，像我這款愛耍的小朋友，攏是到kah4集合的時陣才拼命向前衝，到停車場進前有一段上崎(kia7)的路，有一位阿伯伊的輪椅peh4未起去，阿伯一直拜託人講「好心的，幫我捒(sak4)一下！」，毋過同學攏知影集合的時間就欲到也，有啥人會停落來幫助這位阿伯咧？當然，我也當做無聽著綴(tue3/te3)逐家走過去loo3！毋過，走過兩三步以後，我的良心實在足未得過的，我明明有聽著，也有看著，卻無停落來去幫助彼位阿伯，內心感覺誠艱苦，尾仔我猶是決定翻頭，趕緊走返去幫助彼位阿伯，共伊捒上崎，阿伯歡喜kah4直直共我講：「多謝！勞力！感恩oo5，少年的！」對(ui3)阿伯的說(sueh4)謝中，我koh4較瞭解，我一個小小的動作，對阿伯來講是偌爾仔(lua7-ni2-a2)大的幫助！當然我就是吊車尾上遊覽車的，予老師踅踅唸，毋過我的心內卻是感覺足自在的！假使我拄才毋共(ka7)彼位阿伯鬥捒，毋知影阿伯欲等到底當時才會有人共(ka7)伊鬥相共(kang7)？我想我一定會一路來掛心，一路足後悔的。 

　　我不是啥物(mih8)大人物(but8)，毋過我滿腹有熱誠助人的心，無定著這馬的我未當做啥物大善事或是對社會真有貢獻；毋過我會當盡我家己的能力，拍拼去幫助需要我幫助的人。 

       所以，咱是欲按怎幫助別人咧？就是以家己的能力，盡心去幫助需要的人。若是每一个人攏會當抱著這款助人為樂的心理，這个社會一定會koh4較有溫暖！koh4較有人情味！

       我今也演講就講到這，多謝各位！   

                                                                       　minda 2010.9.9