字體:小 中 大 | |
|
|
2008/08/08 15:33:23瀏覽352|回應4|推薦15 | |
七月時,日頭赤炎炎。 中晝,阿娟唯冷氣誠冷的銀行行出來,手佇皮包仔內底欲提烏仁目鏡通遮閘刺目的日頭光,三寸懸的白色懸踏仔鞋踏佇銀行門口的樓梯岑仔,顧咧提目鏡,踏無好勢險險仔跋倒。參伊相閃身一個查埔人手伸咧道欲共扶,四蕊目睭相對看的時,兩人的嘴攏若像塞一粒滷卵..開~開~開! 「啊~你~阿寬?」「啊~你~阿娟?」 曾經是一對人人欣羨的情伴,分開七年外,抑是像以早,兩人講話定相疊。 阿寬綴阿娟行到阿娟停車的大樹跤,有蔭、涼涼。 :「聽講汝嫁來阮庄跤...偌久矣?」阿寬問。 :「到今仔日拄好一年過兩個月。」阿娟準備開車門。 :「咱來去附近咖啡廳坐一時矣,足想欲知影你過了好否!」阿寬出嘴招阿娟飲咖啡。 :「我過了按怎無重要,你應該關心的,是你彼咧七年替你生三個查某囝的賢妻過了按怎!」阿娟話有寡仔掛骨,七年前阿寬欲走無相辭的傷痕,猶原會疼。車門關倚「phng!phng!phng!....」阿娟快速共伊的進口車開行。 阿寬怢怢徛佇遐,看樹仔跤伊彼台定顧路的漚機車,家己講予家己聽:「阿娟阿,你的命底本成就應該穿奅奅、開進口車,我甘願永遠擔著無情漢的歹名聲。」 想起阿母當年反對透底,伊講阿娟這個查某囡仔唁噭[ngiauh4 kiauh4]閣無體,若欲娶伊來做妻,阿寬就會無娘嬭。 不得已,佇彼年的七夕情人節恬恬來離開。 捧一粒破碎的心,一年過一年,思念,佇每一個七夕的暗夜。 啥知,如今相逢;心.閣較疼!
*試寫小說、小說試寫* |
|
( 創作|小說 ) |