幾落工前置菜櫥仔內，看著半包米粉，已經囥置彼真久。下晡去提茶米兮時袸，半包米粉猶原置的。突然間若親像鼻著卡早家後炒米粉兮香味，一時陣即足肖念耶。都都五點過，新婦也擱愛一點仔久遮會到厝。打開冰箱一咧看，雞禽胸、紅菜頭、洋芹菜、金鉤蝦、大白菜、蔥仔，看起來配頭有夠最，著加提出來洗洗切切的，一屑仔久，一鼎米粉就炒好囉。

新婦返來，看著麻真歡喜，伊紲落擱款兩三項菜，一齣豐富兮暗頓著捧將桌頂。煎牛排、番茄明蝦、撒菠菱仔菜佮我炒兮米粉。後生呷一喙米粉著講:「遮米粉足相阿嬤炒的。」憨孫的聽無斟酌，紲落講「是阿嬤對天頂送來兮喔。」歡喜甲目珠攏會笑。伊講:「維維兮把拔麻對海上寄尪仔物返來乎伊。」看幼囝仔大喙吃米粉，大儂攏總真歡喜。問新婦那會彼都好:一個對天頂送來，一個對海上寄來。聽新婦解釋即知原來維維尹老爸置上海作空課。

想起古早時，阿母定定打阮兮笑K，講阮兩個尪仔某一個披衫一個摯竹篙。細漢兮時爸母疼囝，攏毋乎阮去灶腳渦渦纏。娶某了後，攏愛綴前綴後看儂煮食，學淡薄仔手路。今馬若序細一半擺仔無置厝，麻免驚會去乎枵著。

呷暗飽，貼置交椅歇睏，新婦捧一杯金桔仔茶行到身邊。喙是笑微微，目頭帶憂愁。輕聲細細對阮講:「阿爸請您愛小夸忍耐卡久一屑仔，不通擱去傷著即袜干苦。」阮聽著目屎含目墘，緊佮講後擺阮會恰小心，不甘伊煩惱。接過參蜂蜜兮金桔仔茶，啜一喙甜甜酸酸兮口味，喉甘心也溫暖。新婦的賢慧善良，是囝兒一世朗兮幸福，阮也憑伊兮福氣（託他的福）得著好照顧。勸作儂兮翁婿愛好好體貼某的辛勞，家庭即會完滿。