今仔日又擱是母親節。自從阮細漢兮時陣，逐年遮耶日子，阿母攏會僎一寡四果生花，帶阮作夥去圓通寺燒香，祭拜阿嬤。一直到阮成年、成家，換阮參某囝駛車，帶阿母去燒香。遮咧現此時看起來真平常的代誌，置阮一生中攏總毋捌斷過。

記智中，自出世大病小病紲咧來，真罕咧停過。阿母講阮是不願出世兮幼嬰仔，阿姐嫌阮配頭真濟。父母晚年得子，老爸對阮是惜命命。尚辛苦兮是阿母、奶母佮阿姊輪番日夜專心照顧，一擺擱一擺，對死神兮手中，將阮搶倒返來。

記智尚深兮是三十九歲彼年，在昏昏沉沉彌留中，愛妻牽著阮兮左手，深情兮眼神，欲語還休，幼囝仔撫著阮正手爿兮肩胛頭，直直叫「爹地，精神」。阮用盡力勉強撇開目縫。看著遠遠阿母徛佇房間門邊，含著目屎，毋願踏入來，敢是毋甘心白髪人送黑髮人。細漢兮時厚病痛，阿母時常會佮阮講：「呷過六十，著未互人講夭壽。」

今仔日擱是母親節，後生參某囝帶阮去燒香祭拜阿嬤阿祖，遮擺，阮準備送給阿母兮是阮進入六十歲：生命的獻禮！

後言：佛說敬天下女人皆如我母，天下男士皆如我父。溰禕的生命除了近在我身邊的四位偉大的女性，還要感謝所有的醫生、護士、親友、師長、學友、同仁、及所有一切人、有情眾生的扶持。願法界一切眾生安祥和樂。