《心肝頭的洄瀾》台語詩

細漢時陣，我徛佇荷花池邊

阿母佮我講：查某囝

「蓮花」毋驚爛塗勇敢開，伊帶香味有夠媠

這是咱故鄉的標記.

讀冊時陣老師講：

咱故鄉好山好水好空氣，這是天公伯仔賞賜的福氣.

有一工恁會大漢，無定著會出外去.

毋過愛會記得

美侖山、木瓜溪、太魯閣、鯉魚潭……

閣有遮的親晟朋友，逐工攏會數念恁.

遐爾仔深情的話，毋敢放袂記

伊是阮心肝頭的洄瀾

一波一波一湧一湧

無論佗位，不管底時，伊攏是佇咧

浮沉、浮沉…拍翸、拍翸…

就按呢，我決定倒轉來

發願行「慈、悲、喜、捨」的道

歡喜做甘願受

準做講，我親像火金蛄干焦淡薄仔光

我嘛欲用規世人，踮遮點燈照路.