【相親】台語詩

袂堪得阿母的目屎

姑不將答應相親的安排

不而過，毋敢予阮遐的姊妹仔伴知影

恐驚共我譬相

講阮平常時目睭發佇頭殼頂

無共查埔人看在眼內

今仔日，才都愛予媒人婆紹介

想看覓，這馬啥物世代

逐家攏嘛自由戀愛

敢閣有人咧搬演「對看」的戲齣來 

講實在，這幾年四界走傱拍拚全是求錢財

毋捌想過家己的親事佮將來

身軀邊有誠濟查埔朋友

毋過攏是「麻吉」矣

敢若並無共阮當做姼仔咧看待

枉費阮青春花當開

煞無郎君欲來採

唉！心內的稀微啥人知 

這擺講親情

是阿母三个象桮

請月老鬥跤手牽的紅線

又閣是庄仔內上蓋有喙水的阿旺嬸

出馬替阮找的翁婿

伊漢草粗勇，生做將才，服務金融界

厝內好額，序大人是民代

阮若嫁過去即時成做少奶奶

遮爾仔好的對象看看覓

絕對無敗害

無定著這个姻緣

是天公伯為阮咧安排