頭一擺

阮用阿母的話寫詩

呵咾記載這个共我晟養大漢的所在

毋過有誠濟話

干焦唸有音寫無字

是欲按怎表達我的愛

心肝頭有淡薄失落

閣較濟的感覺是無奈

就算按呢

阮嘛欲試看覓

管待伊用字辛苦，袂輸咧臆謎猜

管待伊比評結果，成功抑失敗

就準做講對家己的期待

就準做講對未來囝孫的交代

親像種花栽

種子暫時覕佇塗跤底

親像囡仔學行路

腳步暫時猶袂穩

有一工總是徛會在

萬項代誌攏嘛有頭一擺

阮猶原會記得細漢讀冊時

若佇學校講阿母的話

就愛罰錢掛狗牌

又閣罰踮運動埕做四跤仔

跳過去跳過來

我想袂曉，講阿母的話是按怎袂使

你敢知，彼是啥款的傷害

你敢知，彼是啥款的年代

這馬阮足歡喜

殖民地統治壓霸的心態已過去

多元文化互相包容的關懷嘛開始

阿母的話佇學校成做鄉土教材

遐爾仔媠的聲韻音調

予逐家閣較熟似

遐爾仔有智慧的語言

予逐家閣較了解

咱的序細

無論佇佗位，不管底當時

攏會得大聲共阿母的話講出來

不而過，小可仔欠缺

現此時傳承阿母的話猶停佇咧

讀、聽、說的坎站

袂得通自然共寫出來，有較無彩

著愛向望逐家做陣

用阿母的話創作寫看覓

寫出人間至情佮鄉土至愛

寫出自然生態佮生命關懷

予阿母的話流傳萬世代