 
字體：小 中 大 |
|
|
|
| 2013/02/28 21:56:01瀏覽168｜回應0｜推薦11 | |
| ◎猶原
一蕊驚惶ｅ目睭 猶原徛佇六十冬前ｅ天頂 尋無四散ｅ身軀佮魂魄 春天覓佇樹頭 起畏寒 趁枝椳 莩出新蘡時陣 偷偷仔吐一口 怨喟 阮知影汝ｅ心肝猶原疼痛 猶原落著綿綿ｅ小雨 猶原 一下喘喟 就攏總是奸笑ｅ槍聲 無論凍霜ｅ風安怎吹 阮猶原知影 汝目睭ｅ重巡是島嶼ｅ海岸 永遠會記得 一波一波ｅ水湧 是歷史ｅ哭聲 槍聲哭聲一聲一聲 聲聲親像春天佇咳嗽 無論凍霜ｅ風安怎吹 血凝凍ｅ紅花 猶原 要開…… ◎毋甘 一支離家ｅ手骨 家已行佇春天烏暗ｅ街路 六十冬前ｅ濛霧 愈撥愈重 倒佇故鄉ｅ厝 一時煞來散無去…… 閃爍ｅ天星 目一下睨 就變作一隻一隻ｅ火金姑 照著時間偏僻ｅ小巷 阮知影 伊是毋甘汝倒吊倔強ｅ身體 毋甘汝美麗ｅ青春 毋甘汝開花ｅ傷痕 亦毋甘汝埋佇土底 永遠無軟身ｅ冤屈 汝甘知影 阮嘛不甘啊 毋甘汝手後ｅ某囝序大 毋甘汝胸坎破碎ｅ理想 毋甘島嶼差一點仔 就徛起來ｅ眠夢…… 無論凍霜ｅ風安怎吹 阮知影 無論凍霜ｅ風安怎吹 就算存一支手骨 嘛要 繼續行…… ◎汝ｅ形影 一片哀愁 寫著汝ｅ名 飄搖佇 六十冬前ｅ春天 風，閣一遍凌遲汝 即個無奈悽涼ｅ形影 汝ｅ形影 親像離花離枝ｅ落葉 想要歸根，哪知煞尋無 母親ｅ土地 汝ｅ形影 嘛是一片斷腳斷手 破碎ｅ夢想 除了哀愁以外 亦是哀愁 無論凍霜ｅ風安怎吹 阮知影 佇月娘出來ｅ暗暝 汝就用流血ｅ空嘴 偷偷仔唱著故鄉ｅ戀歌 哪知……一下唱起 風中攏是汝ｅ哀愁 汝ｅ形影…… 註解： 1.莩（puh）：長出。 2.新蘡（ińⁿ）：新芽。 3.重巡（tîng-sûn）：雙眼皮。 4.毋甘（m̄-kam）：不捨。 5.序大（sī-tōa）：父母親。 6.存（tshun）：剩下。 （陳胤/2007/2/25/阿卻賞/頭賞） PS. 這是六冬前的詩，台語字詞佮目前教育部建議用字無仝，暫時保留原味，但是毋甘佮哀愁的心情卻相仝，相仝咧期待，期待受難的冤魂早一日解脫，期待這塊島嶼有公平正義，親像期待透早的日頭......(2013/2/28) |
|
| ( 創作｜詩詞 ) |
