朋友相照顧，毋通相褪褲

智者佮熊

智者參一位好朋友去遊山玩水，佇山間斡彎的小路煞拄著一尾烏熊散步，對路頭彼爿向怹行過來。

智者的好朋友行佇智者後面，看毋是勢，眼精手快，趕緊覕去山路邊的大石頭後壁，智者猶毋知影一直行，等到發覺烏熊的時，欲走已經袂赴！干干仔著佇路邊的大樹跤靜坐，真正是生死關頭，等到烏熊行到位，伊已經入定去啊！烏熊倚近那鼻那舐，發覺一身軀假若柴頭咧，閣無咧喘氣無好耍，就頭搖尾搖行徙去別位啊！

等烏熊行甲無看見影，智者的好朋友才走出來，共智者叫精神，對智者拍喇涼問講：「拄才烏熊共你嗤母嗤呲，是講啥？」智者應講：「烏熊講：毋通參拄著危險就放捒你的人做朋友。」

出賣朋友

692到694年間，武則天下令禁屠，一个小官叫做張德，怹某生了後生，規家伙仔足歡喜。一寡好朋友聽著攏送禮祝賀，人的誠意歹推辭，張德就佇厝內偷偷仔刣一隻羊煮料理請人客。

人客來底有一个仝款在朝為官叫做杜肅的人，偷偷仔藏著一塊肉，參奏皇上張德違背聖旨。過工上朝的時，武則天問張德講：「聽講你生後生，真正恭喜！」張德趕緊跪咧一直叩謝。武則天閣問：「毋閣你是對佗揣著肉來請人客咧？」張德一聽，面仔攏慄色驚甲白死殺，一直磕頭講：「臣罪該萬死！臣罪該萬死！」

武則天才勻勻仔講：「我下令禁屠，並不包含喪喜事在內，你干焦刣一隻羊仔爾，並無啥物大過失，你起來！毋過此後交朋友愛謹慎。」講完，就共杜肅的奏本提予張德看，杜肅彼時陣是歹勢甲想欲軁對塗跤底覕。《資治通鑒》

患難見真情