■柔腸寸斷

晉朝，河南南昌有一个叫做許遜的人，自細漢就學了武功，到少年武功已經真在手。伊的箭法閣較高明，會使講是百發百中、百步穿楊，伊興趣拍獵。 

有一工，伊佇山跤的草埔仔射著一隻奔走的鹿仔，揣了一睏仔才發覺是一隻鹿仔囝，已經死死昏昏佇塗跤兜！予伊著驚的是：看著鹿仔母無顧一切傱過來查探鹿仔囝的傷勢，看著鹿仔囝已經無啥氣脈，用舌一直舐鹿仔囝的空喙，毋過箭已經射迵鹿仔囝的心槽，無偌久就絕氣死去。鹿仔母誠傷心，向天亦哀亦叫佇遐踅兩、三輾，嘛倒落去。 

許遜看甲真驚惶，倚近一看，鹿仔母已經斷氣。心肝底對鹿仔母也無著傷煞也死去，感覺真好奇，就用刀剖開鹿仔母的腹肚，欲了解致死的原因。尾手才看著鹿仔母的腸仔已經斷甲一節一節碎糊糊，許遜看了真感動嘛真感嘆嘛真後悔。 

感動的是這款的母子連心的骨肉情；感嘆的是人佮精牲仔雖然無仝，毋過母愛疼囝的本性攏相仝；後悔是無故殺害性命

，而且是一箭雙命。這一幕，許遜親像予雷公摃著，生起了懺悔慈悲的心，共兩隻鹿仔收埋好勢，閣共弓箭遏斷，咒誓毋閣拍獵。