〈血 的 系 譜 〉台語微型小說∕陳清揚
（一）銀杏院落

彼欉銀杏，是阿公少年時，予徵召去南洋前種下的，陪伴阮阿爸度過少年時期。經過半个世紀，銀杏樹身已有一个腰身粗，但從來無開花。阿公講：「阿孫，這 欉銀杏猶真少年，欲等甲你當阿公，伊才會開花哩。」。銀杏旁，有兩座瓜棚，用來種匏仔佮菜瓜，匏仔簽煮成香菇肉糜，菜瓜煮麵線，清甜的滋味，厝裡的人 攏愛食。

熱天的下晡時，瓜棚下跤變做臨時戲棚。阿公共兩箱布袋戲尪仔展開，我佮大兄 小弟，一个吹鼓吹，一个挨絃仔 ，一个拍鼓鈸梆子，埕斗裡隨時變成搶搶滾的戲園，長椅條頂大人囡仔，津津有味地食著四秀仔看布袋戲 。阿公佮老爸佇戲棚上呼風喚雨，戲棚跤嘛鬧熱滾滾：阿嬤煮一大鼎番麥，大穗兩箍小穗一箍；兩位阿叔分別賣鳥仔犁串佮拍煙腸；阮老母炊一大籠塗豆，半斤十箍就一大包。一个歇熱落來，兩个阿叔的生活費佮阮三兄弟的學費攏就有下落矣 。

銀杏樹跤，阿公四常對著阮三兄弟講「話本」故事，就是布袋戲的戲齣。「風神 榜」、「三國演義」、「隨唐演義 」、「七俠五義」、「精忠岳飛」、「水滸傳」、「西遊記 」…遮的戲齣，佇阿公的說唱下，故事內底的人物一个一个活靈活現，栩栩如生，遐的精彩的口白，到今猶縈迴佇我的腦海裡 。

當年，阿公鼓勵我考大學，講：「咱陳家三代人，到今無出過一个秀才郎。你愛認真拍拚爭一口氣，考牢大學予厝邊頭尾探聽。」考牢大學後，我佇台北盆地求學戀愛、成家落籍。轉眼間我嘛是三个囡仔的老爸。老母逢人就講：「阮家第二 後生上有才情，是國立大學的文學碩士哦，現此時佇中學教冊，將來讀博士班，欲去教大學生。」。其實，我的文學根基，是聽阿公講「話本」時，年久月深奠定落來的 。

逐年學校歇熱，我會𤆬囡仔轉去故鄉探視老人。院落裡瓜棚上，匏仔佮菜瓜開著 白花、黃花，大大細細的瓜仔叮叮咚咚掛滿棚架。埕斗裡種寡蔥仔、蒜、薑、番薑佮芫荽等，閣有兩畦蕃薯佮一小塊番麥。我提起鋤頭薅草鬆土；老爸佮伊的孫仔都佇銀杏樹跤架塗窯爌蕃薯；老母共刣好土雞仔用荷葉包起來，閣用紅黏塗規个密封好，等塗窯燒甲紅記記，擲入去赤紅的窯塗，崁一寡冷土，一柱香後就是 鮮嫩多汁的塗窯雞矣。

舊年，阮老爸中風，老母子宮癌開刀化療，兩个老人輪流蹛病院。老厝的院落雜草叢生，彼欉銀杏仝款青翠伨拔，微風來時，枝葉摩搓作響，親像正沈緬佇往日 的美好時光裡。敧倚佇銀杏樹仔邊，我對三个囡仔講，「等恁三个攏大漢矣，這欉銀杏就會開花結籽。」大查某囝問我這欉樹仔年紀有偌大，我笑笑仔講：「佮 阿公的年紀平大。」囡仔聽我講唱矣一段「草船借箭」，尾仔囝提議講：「阿爸，不如咱做陣來爌塗窯 。」我講：「好啊，但咱們先動手共埕斗裡的雜草薅除清氣。」

（二 ）血衣

癌末的老母臨終前兩工，親手扞仔一跤桃花心木盒子交代予我，內底有一件泛黃 的白siat-tsuh，胸前一灘污烏的血漬，血漬裡有處破口，二指大細。

「松兒，你知影是按怎你會綴著阿母的後頭厝姓陳？」老母虛荏的聲音，親像深秋尾局裡的蟬鳴，低沉且蒼涼。「阿母唯一的小弟，三十幾年前予政府以叛亂罪 銃殺矣，恁老爸為著延續我後頭厝香火，娶我進門前，答應我後頭厝父母，若生後生，其中一个改對母姓。」老母的遺體火化後，老爸才詳細共我講細漢阿舅的死因。

外公曾經留學日本，受過高等學校教育，日治時期擔任庄裡的保正。阿舅是庄頭裡唯一上台北讀冊的大學生，四 七冬「228事件」後，學校鬧學潮，軍隊直接開入校園掠走師生。阿舅佮幾个同學僥倖逃出校園，毋過佇瑞芳的一家旅社匿藏無幾日仔，就去予頭家 密報，予憲警押去。

無偌久，外公接獲「善堂」來人通知，趕到台北的跑馬町收屍，阿舅予銃殺前，受盡各種嚴刑，屍身軀頂新傷叠著舊創。屍體用牛車運轉來，你老母替阿舅拭淨屍身、縫合空喙、化上淡妝。這領血衫，就是細漢阿舅留落來的遺物。

我終於明白，是按怎高中時代，老母堅決無同意我加入國民黨佮報考軍官學校。

阿爸講，老母誠疼愛阿舅，因為外媽真早過身，老母「姐代母職」，阿舅的衣衫佮鈕仔，攏是你老母一針一線車縫的。阿舅自細漢就真聰明巧氣，日本戰敗彼年，伊自台中高等學校卒業，考牢台北的台灣大學，是庄頭裡唯一的大學生，予你外公感覺真有面子。

你阿舅死了後，外公失魂狼狽，逐工除了啉燒酒猶是啉燒酒，啉甲醉茫茫時，就 提起弦仔，邊搝邊唱、邊唱邊哮。無偌久，你老母嫁過來，外公清醒無幾日仔，閣開始逐工醉酒，聽候我出世彼一冬，咻酒醉的外公跌落池塘裡淹死去。

老爸交代我保管這領血衫，阿爸講：「你細漢的模樣，誠成你細漢阿舅，你媽嘛 上疼你。」

（三）鹿窟春寒

迂迴的山路，車行路到一片豁然展開的山溝，遮就是「鹿窟」。阮家後的後頭厝 都佇石碇、南港、汐止交界的「鹿窟庄」，伊排行老大，「靠山食山」，啥物粗重的工課攏著做，自嘲是「深山林內的粗手戇跤茶妹」，對伊捌代誌以後，逐工 佇「茶葉」、「竹筍」、「蕃薯」裡趁食，佮「牲口」、「飛禽走獸」為伍。

毋捌見過丈人，干焦佇妻的相簿裡看過幾幀寫真照，內底有𪜶新婚時，穿唐裝佮 旗袍的合照，以及徵調南洋前，手扶長柄武士刀的戎裝照。丈人是入贅來的，聽 丈姆講少年時佇瑞芳、猴 硐一帶的礦區做過礦工領班 。

太平洋戰爭開始後的隔轉年，佇日本政府軟硬兼施的徵兵政策下，丈人予徵調去 南洋做軍伕，主要是構築碉堡、戰壕、掩體等等設施的施工。就算毋是前線的作戰部隊，丈人被米軍的砲擊中負傷，跛矣一隻跤，可見戰況不止仔慘烈。丈姆講：「一隻跤破相，彼算是好運的，咱庄子裡幾十个人去南洋，活著轉來的只剩幾 个。」。

丈人跛跤轉來，庄裡有人勸丈姆趁著猶閣少年，身軀邊干焦一个查某囝，另外招一个尪婿，拿錢共跛跤的尪打發走。無幾日仔，風聲傳到丈人耳空內，伊無 有任何怨言，只是家己感覺「見笑」，真「認份」半暝起來偷偷整理行李，鏡台 上留下一封批信，一 拐一跛地行山路回瑞芳。丈姆透早醒來，看著彼封批信，共查某囝託予序大人，掠起「自轉車」一路飆往瑞芳。才逐著平溪十分寮附近，就揣著佇土地公廟邊涼亭裡歇睏的丈人。

跛跤的丈人無想欲予伊某當作廢人「奉待」，「予厝邊頭尾看衰小」，照樣踏著三輪車，透早就落山去市內批貨，一寡胭脂水粉佮女裝布料，紲落來前往平溪、石碇、瑞芳、猴硐、九份、金瓜石等幾个山村喝賣。上山的路段，有寡坡度 真陡，丈人就落來捒車，逐工聽候天暗前才轉到厝。做小生意的利純，閣比「做 山」的農家平均收入懸真濟。

身為長女的妻當然無輕鬆，才三四歲就愛鬥做寡 「手尾工課」：飼鷄鴨，嘛著幫襁褓裡的阿弟換尿苴仔、泡牛奶粉。六七歲時，逐工天未光，就共阿公摸烏上山挽竹筍 。竹筍挽轉來，鬥相共共筍殼剝淨，倒入大灶裡煮熟，等筍仔涼矣，平鋪佇埕斗裡晾曝。紲落來閣跟綴阿嬤去茶園裡挽茶心，掠茶蟲。

丈姆原本無按算予伊去學校「讀冊捌字」，只想共伊留在身軀邊鬥相共家事 ，是丈人堅持甲予查某囝送去學校「讀冊」，將來伊才會揣著好對象。毋過，妻才 去學校「讀冊」半年外，就發生「鹿窟基地案」，伊老爸予官廳以 「匪諜仝路人」罪名被逮捕，彼時是1952年的年底，丈人被判處十二冬的重刑，後來，死佇台 山區的重刑犯櫳仔內，死亡証書上寫著「受刑人疑久長病厭世，吊脰身亡」，真相敢有「自殺身亡」，因為無留下遺書，丈姆一直感覺懷疑，但苦佇「死無對 証」。

丈人逐工佇外面走闖做生理，外面的所見所聞，轉來到厝總會佇茶餘飯後，當做新聞講予厝裡人聽。岳父做生理時路過村長伯陳啓旺厝裡，四常入去討茶水 啉。丈姆講：「可能是經常在村長厝裡出入，予人誣告才作陣予掠去判刑。咱庒子內彼當時有百外人予警總掠去菜堂，查埔查某老人，用跤銬手鍊縛成規串，一个一个吊起來拍，實在真妖壽。…當年遐的來咱這覕的外位人攏改名換姓，咱庄 子裡稱呼外位來的遐的人為『覕山仔』，庄民濟半相信遮的人是為著逃難才上山 來覕的，聽講伊們經歷過二二八事變，真濟是官廳欲掠的人。」

「阮阿爸予掠走後，我休學半冬佇厝裡鬥相共。」，妻講：「後來，是阮阿公踏三輪車送我去市仔的小學繼續讀冊。我落第一年，比班上的同學塊頭懸。班上的同學有人會拍抐涼恥笑我，講我的跛跤阿爸是匪諜，阿公是老匪幹，我是小匪諜，阮規家伙仔攏是匪諜。我受氣地追打𪜶，講：敢罵你袓嬤是小匪諜，我摃予你扁扁扁，變成一隻小蝴蝶。」，妻邊形容邊握拳，作勢拍人的模樣，逗甲眾囡仔哈哈大笑。大查某囝湊趣地講：「阿母，原來妳細漢時，就恰北北，莫怪阮班的臭男生，攏叫我恰查某，遮的攏是你遺傳予我的。」

轉來到阮某的厝門口，紅磚仔烏瓦的三合院落，埕斗裡平鋪著幾片「桿模」，晾曝蕃薯簽佮筍乾。開正的鹿窟細雨霏霏，罕得好天，就算日頭探頭，欲中晝仔時，山風吹面，猶會當感受著微微凉意，以及混合草葉青芳佮殕溼味的氣息。

（四）地鼠：藏寶圖的玩笑

對我捌代誌以來，下班後的老爸，換上工課服，都變成一隻「地鼠」，我當然必須愛共伊「巡頭看尾」。

這幾十冬來，大半座鰲峰山腹裡的坑道，差不多攏予老爸挖遍矣，因為老爸一直深信無疑，坑道裡藏著日本人撤離時，無法度帶走的黃金珠寶，這批寶藏根據阿爸講，是二次大戰期間，日本人向老百姓搜刮來的。

阿爸的認知來自阿公留落來的一跤皮箱，箱仔底有聽診器、注射針筒、手術刀佮鑷子，以及一張寫佇牛皮上的「藏寶圖」。少年時的阿公是一个日本軍醫的助手，佇大戰後期，日軍徵用數百民伕挖掘鰲峰山腹的防空洞，彼个軍醫奉命前往工地建立醫務站，為施工部隊佮民伕提供醫療服務。

密如珠網的坑道，猶咧挖掘時，日本天皇宣佈「無條件投降」的詔示下達矣，隔轉工頂晡，數百民伕煞「集體失蹤」，親像自人間蒸發掉。對按呢流言不脛而走，攏講這批民伕予日軍「集體密祕處決」，背後的原因是坑道裡可能藏囥一批為數可觀的金銀珠寶。

軍醫無綴咧遣返，伊自殺身亡矣，留落來一份藏寶圖佮一封遺書。遺書裡講出彼批失蹤的民伕，攏是予伊奉命下藥毒死的，為此，伊的良心深感愧疚，對按呢決定以死謝罪。軍醫無囝兒序細，就按呢希望後人若揣出這份寶藏，會當用來收容遐的因為戰爭失去家庭的孤兒。

阿公保存著這跤皮箱，佇伊眠床跤的地陷裡。聽候「二二八事件」後，伊參加「二七部隊」，從此失蹤。隔轉年，老爸佇發落阿公的房間時，偶然地發現這跤皮箱，自彼陣起就親像著魔仝款，逐工下班後，就往坑道裡去，變做一隻名符其實的「地鼠」。

這三十外冬來，老爸差不多清通每一條坑道，毋過先後除了揣著一寡鏽蝕的頭盔、腰扣、水鈷、刺刀佮空罐頭等物件，以及一寡玻璃酒矸以外，寶藏則始終無下文。

老爸過身前的彼年，伊揣著一跤鋁製便當篋仔，內底有另外一張以牛皮寫著的第二封遺書，批信上的手筆，老爸知影是軍醫留落來的。遺書裡起頭是一句會失禮語，因為伊「開了一个滾耍笑」紲咧講「寶藏」的代誌是伊「虛構的」，伊希望這座地下碉堡毋通因為無人管理拋荒掉，遺書上講：「這座四通八達的碉堡，將來會當闢建為病院，造福後人，替我這个錯誤的時代贖罪，並留落來成作可玆紀念的歷史痕跡。」

「寶藏」的希望破滅矣，老爸將這兩份遺書交予鎮公所，對彼時了後，老爸就䖙病無起，聽候離開世間。幾年後，「鰲峰山公園」對外開放，成做鎮民的休閒場所，但地下坑道干焦開放一小部分。鎮上流傳著坑道裡「有歹物仔」的謠言，繪聲繪影地講有穿軍裝的日本軍人鬼魂出入，真濟人深信無疑，我則是為此感覺啼笑皆非。

(五)、〈千萬遊民〉
洪七公是一个遊民，蹛佇火車站地下道，可是伊毋是印象裡一般的遊民。伊總是穿插退色但潔淨的唐裝，逐工固定到自助餐店抑麵館用餐。初熟識伊時，叫是伊是活佇古早時代的人。伊溫文儒雅，花白的長頭毛佮喙鬚，梳洗了真清氣清爽。伊打得一手精湛的陳氏太極拳，從來無向來學拳的人收取學費，敢若並無缺所費；伊拜的神嘛誠特殊，是神醫華佗。

無人清楚伊的來歷，無人聽伊提起過家己的身世，伊嘛從來毋捌回答凊彩人關於伊身世的提問。伊就像對古早誤入現代時空的古人，前半世完全隱沒咧遙遠的古早裡。伊敢若從來毋捌餵食飯穿衫發愁，就我所知，伊並無有任何固定的收入，嘛無接受社會局按月的救濟金。不而過，伊捷捷對家己的錢袋捾錢出來，將車頭地下道裡破病的遊民朋友送去看醫生，伊是遊民喙中的土地公。

最近，地下道來了一个精神狀態無偌穩定的婦人，聽講伊尪車禍死去後，予大家官家予攆出來的。七公佇車頭附近揣了一間小套房，安坐彼个婦人。幾月日後，婦人的腹肚漸漸仔膨起來，真濟閒言閒語不脛而走，有人講七公伊「拐人媳婦」，有人講伊「瞞著老妻在外頭金屋藏嬌」。真濟人攏咧揣測誰是偷偷播種的夭壽人，被懷疑到的人，總是規面無辜狀。婦人堅持共囡仔生落來，彼陣車頭地下道裡的氣氛變甲有寡「怪奇」。

聽候胎兒出世彼暗，七公的身世之謎才綴咧敨開。彼是个風颱暝，風大雨急，囡仔偏偏選佇這陣出世。因為胎兒跤下頭上，情況危急，七公先敲電話叫救護車，偏偏市區真濟路段淹水，救護車一時片刻過毋來。焦急嘛毋是辦法，七公臨時敲電話揣我這个徒弟仔去鬥相共，閣共我吩咐去便利商店買醫藥仔用的酒精佮消毒棉。我穿插雨衫趕到「小屋」，猶是沃成落水雞。只見七公掀開一个鐵盒仔，內底整齊排列各式手術刀具。七公鎮定地共酒精倒佇消毒棉上，絚手地一个个擦拭刀具。紲落來撩起孕婦的衣物，劃開腹肚皮，佇我眼前將血淋淋的胎兒搝出來，閣來共空喙縫合。我一个查埔人，竟然充當作一回助產士，毋但予我開了眼界，閣較是畢生難忘。

原來，七公少年時曾經是一个婦產科醫生，四處幫孕婦動落胎手術，身價數千萬。七公對我講，凡勢是因為拿掉傷濟無辜的小生命，趁了傷濟無天良的僥倖錢，天公伯仔欲懲罰伊。當伊的愛妻有身臨盆的時，拄著難產，彼時伊無別的選擇，嘛像這馬揤咧家己操刀，但因為愛妻血崩，伊干焦會當目睭金金看著愛妻佮窒息過久的胎兒做伙死佇產台頂。伊起狂共手術刀插進持刀的右手掌心，從此離開家己開設的婦產科病院，開始遊民生活。我知，遮寡年的遊民生活，伊是以自我放逐的方式來贖罪。