巴士司機真實撞鬼經歷

文/來自嵐仔頭部落格 2009-03-03

話說當日我係返夜更嘅，咁當晚收工果時(大約係凌晨嘅1點左右)，我都係如常咁經朗屏村返巴士車廠加油、洗車咁啦，其實我哋呢行大部份的師兄於收工返廠的時候都會將所有嘅車廂燈熄了(我想大家都應該會見過)，所以當時在車內的環境都係相當暗，當然我都唔例外會熄了燈啦，咁當我駛到朗屏村對開嘅燈位果陣，因為紅燈嘅關係所以要停車等轉燈咁啦。

就在停燈呢個時間,我好清楚咁聽到上層有D聲，而果D聲音我好肯定係腳步聲，而果D腳步聲好明顯係由上層車尾處一路咁行去車頭位置(可能係樓梯位掛，大約啦大約啦)，我心想,無理由仲有人架，因為我習慣每次收工前，我一定會檢查上下層車廂確定所有乘客走了，我先會熄燈走人。

而喺呢個時候我就更係望下塊潛望鏡睇睇咩料啦,果然比我睇到D嘢喎 ，佢真係企咗喺上層樓梯口，咁係同一時間燈號轉綠燈，咁我就唯有開車繼續返車廠啦，我都想算啦,唔理祂(鬼)咁多啦，點知喺行車途中，我喺塊倒後鏡到居然見到祂已經坐咗喺下層落車門後面果張椅到啦，當時祂係伏低個頭嘅，我心想：『你嚇鬼咩』!!!我見到祂嘅時候，祂只係無動作咁坐喺到又無出聲(好彩祂無進一步行動或者出聲，如果唔係都唔知應唔應祂好囉)。

雖然我本身都見慣呢D(朋友)啫，但係我一向都盡量唔會同祂們有咩接觸，話晒對個人運情都唔係咁好嘛！講返祂啦,雖然我係見到祂,不過就睇唔到D五官咁啦(其實呢D朋友好多時都係睇唔清楚D五官,都好正常架)，咁我就繼續行車啦，當時我無即刻開燈，因為我唔想咁清楚咁見到祂同埋嚇親大家(我和祂)都唔好嘛，直至臨返到車廠前我就大叫：

喂，我要收工啦，你要走啦，咁過咗幾秒之後我就快速地開著車廂的燈,而喺呢個時候我再望倒後鏡就已經唔見咗祂囉!