祖雲達斯搶先殺入歐聯決賽呀！呢支意甲班霸今晨喺歐聯4強次回合，憑住巴西國腳丹尼爾嘅一傳一射精彩演出，最後喺主場以2比1小勝摩納哥，兩回合計贏4比1晉級，繼2015年後再次殺入決賽。今次亦係「斑馬兵團」歷來第9次打入歐聯決賽，之前佢哋8次入決賽，隻得2次贏冠軍，不過今次「斑馬兵團」狀態Fit爆，話唔定可以繼95年後再嘗冠軍滋味喎！

首回合主場輸0比2，摩納哥今場早段係威係勢，超新星基利安麥巴比更喺開賽5分鐘就窄位射中柱，隻係僅僅越位在先。祖記踢到10分鐘就有今場波監刑滿復出嘅防中基迪拉，因為拉傷大腿被調離場，由馬治斯奧入替。

以為祖記會略受打擊，點知之後就係主隊世界，希古恩同文迪蘇傑都先後有單刀機會，但都畀今場表現神勇嘅摩納哥門神蘇巴錫救出。不過去到33分鐘，祖記一次快速反擊，由丹尼爾前場右路斬遠柱，後上嘅文迪蘇傑無人看管頭槌攻門雖然畀蘇巴錫擋出，但佢第一時間上前補中，為祖記取得領先。之後到完半場前1分鐘，祖記左路角球傳中，蘇巴錫用手鎚打出，但祖記中場丹尼爾一記離門25碼嘅「窩利」世界波直接抽入，半場祖記贏夠兩粒，總比數領先到4比0！

換邊後祖記攻勢稍為放緩，摩納哥則先後換入湯馬士林馬、法賓奴泰華利斯同謝明，並喺69分鐘憑基利安麥巴比接應傳中近門撞入，追成1比2，算係攞番個彩。之後雙方具威脅射門都唔算太多，反而有少少火藥味出現，祖記前鋒希古恩更被客隊球員踩傷大髀，文迪蘇傑又因為追住鬧客隊中堅基歷克被罰黃牌，最終戰果未有再變，祖記次回合再贏2比1，兩回合計贏4比1，率先殺入下月3日於威爾斯加的夫舉行嘅決賽。

東網體育同你追實體壇每個精彩時刻！　

http://bit.ly/2ecTF2A　 

原文地址：http://hk.on.cc/hk/bkn/cnt/sport/20170510/bkn-20170510043741023-0510_00882_001.html