學生親藍 蔣為文指「認賊做老父」

蔣老師，

拜讀過你早前台語參英語濁音的語音實驗比較，得著誠濟幫贊。

最近你那會變甲遐爾仔無理性，是你的使命感抑是偏執心，予你變做"順我者昌，逆我者亡"，規个人袂輸相拍雞仔仝款，四界找人相鬥?

這馬連家己的學生，你著用"認賊做老爸"遐爾仔重的話來攻擊。做老師的，只管傳授學識，做一个學術上的好模範予學生看。哪裡會使去管學生頭殼仔底囥啥物物件咧?

著算你對台語、台灣的信仰嘛無予你這款的權利。你的作法，參你口中所詈罵的國民黨有啥物無相仝?

這種明其知你的學生參你權力無對等的濫糝來，使人毋敢相信，這是任何一个老師做會出來的代誌。

你予人的感覺是已經變做走火入魔囉，你家己敢攏毋知影？免講是主張佮你無仝款的人，你的朋友敢袂驚參你有牽連？捌你的人，想欲替你講幾句仔辯解的話的人，請你替這寡人留一寡後步。做台語文，毋免一定愛做甲遮離譜(辛苦)，毋免愛做布袋戲內底的"恨世生"。

你所任教的成大台文系，你的同事，你的學生，無一个人是你的工具。這馬，你共你攻擊的對象揣到學生的身上，你講這是佇咧做台語文，這是佇咧做教育。

欲叫我按呢相信咧！