按照教育部102.10.01修正通過的"提升國民中小學本土語言師資專業素養改進措施"規定，本土語言現職教師通過B2級的比率，規定愛佇103年底達到授課總節數的30%。
現此時各个學校拄到的困難就是：

1.到今已經三月中囉，各校已經合格的教師比率攏誠低，提鴨卵0%嘛毋是無。若講年尾要求愛達到30%，就算講共所有的老師攏押(姑情)去參加認證考試，嘛是阿婆仔生囝，誠拼咧。

2.這馬佇咧教本土語的現職老師，誠濟人家己母語斷奶就傷早，嘛有講本土語講甲足滑溜，講著讀寫拼音就艱苦罪過，B2雖然是合理的教學級數，毋過對這寡老師來講，實在就差彼一屑屑仔。欲拼無動機，嘛缺欠方法。你共講，你若沒通過B2，就無法度閣教本土語。無定著伊會應講：好啊，啊我就誠實學無路來。

3.現職教師比率若無佇年底達到30%，逐个學校是欲去佗倩遐濟支援教師來塌缺? 比論講，某一个學校應該愛有15個現職的授課老師通過B2考試，103年底通過4个爾爾。104年開始，原來咧教本土語的11个老師照理講都無資格閣教(106學年正式開始)，毋過學校嘛是愛閣拜託彼寡老師繼續教，因為支援教師的人數，根本就無夠所有的學校去搶來教。

4.學校嘛無錢去倩傷濟支援教師。
.
政策要求佇103年底跳票的可能誠大，佇學校並無強制力的情況之下，向望頂級機關想辦法鼓勵、輔導現職授課老師進修學習，集體報名，並且補助逐家的報名費用，予逐家會當順序對B1跳B2。這个規定才袂親像咧規定耍的。