海伯仔                              

         日頭赤焱焱，拄過晝，二絃的樂聲閣響起矣！阮喙綴咧唱：「......嘿呀囉的嘿，嘿呀囉的嘿呀，咿嘟咳呀囉的咳.....」，海伯仔上愛挨這首「桃花過渡」。

        海伯仔做人面慈祥、心善良，是誠好的厝邊，伊是裁縫師，大部份攏是做男裝，罕得做女裝，所以來揣伊做衫褲的攏是查甫的，阮捌請伊共翁婿做一領西裝褲，二工就好矣！跤手猛掠，車工足幼路的，翁婿呵咾講穿著真四序，價數閣誠公道。

         平時，海伯仔攏佇透早就開工，做到歇晝，食飽後若有眯去，就睏目nih仔，醒來隨接落趕工，若無睏去，就會放輕鬆挨二絃樂暢一下，海伯仔咧挨二絃的時，表情誠趣味，目睭瞌瞌、喙㧣尖尖、身軀搖來搖去，伊干單挨絃，毋捌聽伊唱出聲。

         海伯仔信仰主耶穌，生活簡單勤儉，安居樂業，若有閒工的時，攏會共顧客佮親友傳福音。有一工，海伯仔人無爽快，講是無細膩跋倒傷著頭殼，厝內的人緊叫救護車，共送去病院急診，檢查詳細後，醫生講海伯仔的頭殼內有凝血角，愛手術提出來。毋過，海伯仔一直毋肯同意，伊講：「我老矣！無需要冒險，將家己的頭殼予醫生做實驗。」毋管某囝按怎共勸都無効。

         後來，病院共海伯仔送轉來厝裡，經過幾工仔，伊就歡喜上天堂去矣！厝邊仔攏誠數念伊，逐家攏講海伯仔若肯接受手術，予醫生共凝血角提出來，一定會健康食百二的。

         又閣過晝矣！斟酌聽......遠遠親像有傳來二絃的樂聲......「嘿呀囉的嘿，嘿呀囉的嘿呀，咿嘟咳呀囉的咳.....」，阮攑頭看天......，感覺著海伯仔佇天國嘛真樂暢咧過日矣！

                                                                                  minda 2013.9.30