故鄉的冬節－圓仔、菜繭、雞母狗仔              

　　佇冬節這工，阮澎湖人除了挲(so)冬節圓、做雞母狗仔，koh會包鹹的佮甜的菜繭(kán)，炊熟以後，規厝內攏鼻著陣陣米的芳味。

冬節圓仔、雞母狗仔佮菜繭，攏是用米做的。先共秫(tsu̍t)米浸咧水，幾落點鐘後才用石磨仔來挨做米漿，紲落共米漿倒入麵粉袋仔，缚(pa̍k)予絚(ân)，扛石磨仔來硩(teh)佇頂頭，予水份沓沓仔(ta̍uh-ta̍uh-á)流予焦(ta)，水份流焦以後就變成米粞(tshuè/tshè)，才共米粞提來撋(nuá)做一丸一丸，按呢就會使用來挲圓仔、做雞母狗仔佮包菜繭矣(ah)。

挲圓仔逐家攏會曉的，毋過欲挲攏平大粒，逐粒攏圓lin-lin是真無簡單的，阮細漢時挲的圓仔是大粒細粒攏有，歪koh斜眼，阿母講若欲提來拜拜是足歹看的，予阮鬱卒到嘴翹te-te，共阿母應講：「會食的著好，莫koh共人嫌啦！」

雞母狗仔是用米粞來揑(liap)做豬、狗、雞、鴨仔等等。記憶中阿媽揑的雞母狗仔上媠，做到足親像的，豬就是豬，狗就像狗，雞母tshuā規岫(siū)的雞仔囝，予人看著誠佮意。阿母揑的雞母狗仔嘛足媠的，豬仔、狗仔、雞鴨逐隻攏肥tsih-tsih，足古錐的。啊若阮這囡仔揑的是看攏毋知咧做啥貨？雞母狗仔若炊熟是媠噹噹，攏毋甘共亻因 (in)食掉。

菜繭是用米粞做皮來包餡，鹹的是包高麗菜，芹菜、豬肉、魷魚等，甜的是包塗豆(舂(tsing)碎)佮芹菜珠仔，炊熟是食丘(khiū) koh芳，兩種口味攏真好食，我較愛食包塗豆的，彼種滋味予阮到今(tann)攏猶會記得。

結婚後，阿母有幾落擺佇冬節前，攏對澎湖寄伊做的菜繭來予阮食，後來阮毋甘予阿母傷操勞，共阿母講毋免koh寄矣！有一年，阿母koh寄菜繭來，是去馬公(Má-king)市仔買的，阿母佇電話中講伊無夠力通挨石磨仔，就買便的來食，koh講買的無伊做的好食，我食了嘛是按呢感覺，生理人咧(teh/leh)賣的攏做細細个仔koh減料，確實佮阿母親手做的是天差咧地，無得比矣。

今仔日是冬節，查某子早著買桂冠的圓仔等我煮，毋過，我頭殼內想的是故鄉的冬節日，佮阿媽、阿母、小弟(妹)鬥陣包菜繭、挲圓仔、捏雞母狗仔的情景……，愈想愈數念爸母……，拍開電腦，用skype敲長途電話佮阿母、阿爸輪流講規點鐘的話，後來嘛講著菜繭，阿母講村內活動中心有舉辦做菜繭的活動，伊有去參加，講少年的跤手足猛(mé)，一人做數十个，阿母講伊才做十外个爾爾，我笑笑共應講：「是做趣味的啦！做有夠通食就好矣！傷濟食未了。」阿母聽了才笑出聲講：「是矣，有夠通食就好矣！」

故鄉的冬節，留予阮深深的記憶，爸母的親情上寶貴，定定溫暖佇阮的心頭，啊那村內舉辦做菜繭的活動，是欲予少年輩的攏學會曉的挲冬節圓、做雞母狗仔佮包菜繭， 傳承古早味的冬節日，一代koh一代 ……。               

                                                     minda 寫於2008冬節 / 2014.12.16 修 

附註：

1.粞(tshuè/tshè)：去水的糯米團。

糯米浸泡後磨成漿，裝入布袋中，上放石塊或木棍壓一段時間，使其排去

水分成糯米塊，可用來做粿、湯圓 等。例：粿粞、米粞。

2.肥tsih-tsih(肥朒朒puî-tsut-tsut又唸作puî-lut-lut) : 胖嘟嘟。形容肥胖的樣子。

* 圖片－澎湖縣府網。

 現代人做的媠koh古錐的雞母狗仔。 

鹹菜繭包著足鮮臊的餡料。