引阮思鄉的一首歌   

       自捌事誌到大漢、讀冊、出社會、結婚生子……，到即馬歲數五十外仔，心內所愛的歌，對育子歌、囝仔歌、少女情懷的歌、藝術歌曲、時代的流行歌、軍歌合宗教的聖歌等等，佇人生路上的每一個坎站，阮攏有學唱過，會記得做學生的時代，嘛捌為著欲學一首流行歌，加便當放咧，佮歸陣同學興到無食中晝頓，『苦酒滿杯』就飽囉。

進入中年，生活經歷過滄桑，對歌曲的喜愛偏向華語佮台語的流行老歌，尤其佇咧研習台語即幾年中，特別愛咱的台語老歌，阮認為歌曲，無一定愛開嘴家己唱，一個人恬靜靜，用心來聽歌嘛真感性。

台語的老歌中，有一首經典的名曲「黃昏的故鄉」，佇幾落年前就捌聽過，彼當陣就真合意即首歌，感覺歌詞寫了足好，深深描寫著出外遊子思鄉的心情，最近即幾年，毋知是阮年歲漸大較會感慨，抑是離開故鄉太濟年囉，也是因為故鄉的父母已經年老仔，予阮較掛心，對「黃昏的故鄉」即首歌的感觸，煞愈來愈深。

「黃昏的故鄉」，即首歌有真濟位歌星唱過，干單『音樂磁場－孫建平』所主唱的，才是阮上愛聽的，尤其是第三段的歌詞：『叫著我，叫著我，黃昏的故鄉不時佇叫我，含著悲哀也有帶目屎，盼我返去的聲叫無停，白雲啊！你若欲去，請你帶著我的心情，送去予她我的阿母，毋通來未記的。』其中的意境，特別引動阮的情緒，流落無聲的目屎。

 共目睭輕輕仔瞌(kheh)起來，予『孫建平』低沉復(koh)帶著磁性的歌聲，唱出「黃昏的故鄉」美麗、感性的歌詞，帶動悠揚穿心的旋律，tshuā阮遨遊，沉醉在『音樂磁場』的河流中，逮(tuē)著流水直直去……，直直去…….，遠遠彼爿親像有叫阮的聲音，清風佮白雲伴阮飛過曠闊遙遠的大海，返去到阮的故鄉，返去到阮的故鄉……。

        minda 2006.4.25