貓眼石斛蘭

進前，好友阿卿送阮一穎伊插活的貓眼石斛，阮用心顧，沓沓仔大，佇連紲發幾支仔新枝條的期間有開過2蕊佮4蕊的花，後來共徙入大个盆，落一寡肥生湠足緊的，枝條愈發愈粗閣懸，葉仔青綠綠，這段期間攏無開花，煞對枝條發出10幾支的芽穎，阮攏共挽落來送親友種，佇舊年寒天開始沓沓落葉，過年後春來溫暖就落光光矣。

阮向望伊會當緊結花莓，期待鬧熱開花，就逐工金金相，有一工終於相著枝條有動靜矣！一工過了又一工，算算咧12支花莓，歡喜kah四界共厝邊仔展寶，哈！

花開的時，無想講煞拄著歹天，雨若是落停就隨出大日然後閣落雨……，種花上驚這種天，特別是較幼秀的花攏未堪得按呢變弄，一陣涼一陣熱舞舞咧就損害5支花莓無去，開成功的有7支，7葩花黃錦錦(1葩10蕊)，花中央是咖啡色的，誠親像貓咪仔的目睭，真值得欣賞，多謝阿卿送阮花。

                                                minda 2024.6.6