紅尾溜(ㄐiu 字韻)

溜溜鬚鬚紅尾溜（liu）

挽來共人面羞羞（siu）

一條長長足軟柔（jiû）

摸著像蟲會伸縮（kiu）

minda 2010.7.2

共紅尾溜徙去校內"語言教室"的小花園種，最近生湠kah4誠鬧熱，
上長的有15公分，學生囡仔若行過攏會停落來伸手摸摸看看的，
 表示足佮意，攏喝講真古錐誠特殊，也有毋敢摸的，講親像刺毛仔
蟲，足恐怖的 !

紅尾鐵莧(紅尾溜)

幾年前的熱天，阮佮朋友相約佇埔里的一間庭園餐廳聚會，逐家享受一寡平時食未著的野菜佮溪蝦仔，愈(na2)食愈開講，庭園中吹來陣陣的涼風，也有聽著鳥隻的歌聲。

食飽後，猶無想欲離開，逐家行入庭園去欣賞花草，哇 ! 奇花異草種未少，庭園有經過設計，小橋流水足清幽的。後來，行到一叢橄欖樹下歇睏，發現塗跤有一點一點紅吱吱的物件，行倚去跍(khu5)落共看斟酌，原來是一種植物，發一支一支的紅尾溜，愈(ju2)看愈古錐，就佮朋友一人搝(khiu2/giu2)一寡，想講提轉厝裡插看會活否 ? 

轉到厝就隨共插入盆仔內，足用心照顧，經過幾禮拜，誠實有活起來，毋過就是未媠(sui2)，發出來的紅尾溜煞變做細細箍(khoo1)仔koh4烏烏，阮有共下肥，猶是攏未起勢，到入冬的時規叢攏強欲焦去。阮敲電話共朋友探聽，問看伊種了按怎? 朋友講伊插無活早就焦去，叫我要負責攢一盆予伊。

花草若種未媠，原因足濟，看是應該未歹照顧才著，為何這歹種? 本來想欲放棄矣，想想咧......逢春看會起勢否  ?  koh4想講伊是生長佇橄欖樹下的，來共換一下仔環境看覓的，就共伊換種佇壁盆內，吊佇門跤口，過年後，春雨綿綿，看伊慢慢仔有較青翠，叢有較旺起來，也有發出紅尾溜囉 ! 

哈~ 紅尾溜愈發愈濟，真大支(有10公分長)，成顯目，社區內的太太透早行過看著，開嘴就討欲種囉 ! 查某子放假轉來，阮招伊欣賞，哎喲喂 ! 阿母，汝若會愛這花 ? 一條一條紅紅像蟲咧！看著足怪的 !  我應講：哪會，足特殊的喔！

http://blog.xuite.net/khingbi/twblog/146026739