徐㴓喬（Asha)今日（16/8）以嘉賓身份現身旺角出席旗艦店開幕。提到憑ViuTV劇集《大叔的愛》而人氣爆升，火速成為炙手可熱廣告商的新寵兒， Asha表示：「而家真係多咗嘢做，係比較忙咗而少咗瞓覺。不過就真係好開心又興奮。（叫公司加人工！）咁梗係冇啦。其實我睇錢就唔係好在意，反而我係睇工作為先，咁所以錢並唔係我要睇嘅第一樣嘢囉。」

問日到會否接拍針灸豐胸廣告？擁有豐上圍的Asha笑言：「我覺得針灸豐胸好唔適合我，好似有啲怪囉。因為可能我本身鍾意平平地嘅，唔知係咪因為之前做開Model嘅關係。（從來冇諗過要豐胸？）真係冇。由細到大我都唔鍾意件衫前面突起，咁所以我真係要為飛機場嘅女仔爭吓氣，我哋都OK㗎，哈哈！」

(香港01)