懊惱(台語)

( 一 )

早起洗臉時

手機仔拍交落馬桶

袂震袂動，害去

師傅講“ 愛換新機仔囉！”

電話號碼愛閣再輸入

UDN部落格、Line、愛重新掠

舞甲歸辦晡

Line嘛是無法度使用

( 二 )

安心室內的氣味

毋是無愛出門

嘛無是新冠疫情影響

只是無法度忍受

耳空重

聽無的歹看面啊！

( 三 )

烘好俗麭

揣無 ba tah，果醬

足濟情話

揣無思慕的妳

( 四 )

想欲掠天頂的月娘

想欲掠轉來流失的青春

總是無採工呢！

( 五 )

著生驚，金金看

躊躇棋子欲囥佗位

算計出了差錯

失誤的人生？

註：

拍交落 ：掉落

掠 ：下載 。 抓、補

舞甲歸辦晡 ：忙了大半天

毋是  ：不是

耳空重 ：耳背、重聽

歹看面 ：難堪、丟臉

烘好俗麭 ：烤好吐司

揣無  ba tah ：找不到  奶油

無採工 ：徒勞無功、白費工夫

著生驚，金金看 ：受到驚嚇，凝視

囥佗位 ：放哪裡