阿嬤曝菜脯欲候啥人吃
 
　　　　　阿嬤曝菜脯欲候啥人吃
 
　　　　　欲候我的戇孫仔吃
 
 
　　　　　有一天汝就要會記得

　　　　　毋驚伊落土賤，毋驚伊無日頭
 
　　　　　阿都愛撥撋，阿都愛撥撋
 
 
 
 
　　　　　阿嬤曝菜脯欲候啥人吃
 
　　　　　阿嬤曝菜脯欲候啥人吃
 
　　　　　欲候我的乖孫仔吃
 
 
　　　　　汝看，要把薟薟的味曝候走
 
　　　　　要把鹹鹹的汗曝候乾
 
　　　　　要把伊的脯脯曝候伊甘甜甘甜
 
 
 
 
　　　　　阿嬤曝菜脯欲候啥人吃
 
　　　　　阿嬤曝菜脯欲候啥人吃
 
 
　　　　　欲候我的乖孫仔的乖孫仔吃
 
　　　　　欲候我的乖孫仔的乖孫仔的乖孫仔吃


 
 

春耕

 
佇最後一季收割以後到春天播稻仔進前，田地被充分來利用
 
有時陣來種作油菜，等候著壓落作肥料
 
 
 
有時陣來種作菜頭這款好種作的簡單性農作物。所以每到過年時
 
菜頭也變作家家戶戶時常食用的蔬菜囉，有人也稱呼這是年腳菜
 
 
 
加出來的菜頭可能為著好保存，已早的人就把伊醃作菜脯
 
聽講洗清氣的菜頭剖屏後先挲鹽，揉搦以後瀝候伊乾，再曝日頭
 
天氣好時兩三工人便完成。天氣歹時也可能一工一工一直曝落去
 
 
 
最近路邊經過
 
四常就會當看著一擔一擔的菜頭佇裏日頭下等咧做菜脯乾
 
 
 
一般，二十年以上的菜脯咱稱呼伊作老菜脯。菜脯變作烏溜烏溜
 
聽講，三十年以上的老菜脯會烏到出油
 
 
 
聽講，老菜脯真甘甜又閣解毒兼清涼退火
 
脾土袂開的囡仔亦者老大人，會當煮糜候伊食開脾
 
暗內傷的人，聽講嘛會當食來去傷解鬱
 
 
 
想著，三十年以上的老菜脯真正是無簡單
 
毋知是媽媽曝的，亦者是阿嬤曝的
 
 
 
遐爾多年的老菜脯，想來
 
除了彼味嘴內的甘甜，更加有歲月溫柔的香頭啊