三煞，好事來歹事煞

　　昨兩層歹事一層好事，叫是好事來歹事煞，好事毋但是好名聲，有賞狀佮5萬箍賞金，閣有5工公假通佚陶（遊玩）。歹事好事攏毋敢隱瞞，暗頭仔老實共某招認，先予罵一睏，我是乖乖毋敢應。落尾才講夆表揚足光榮，有賞真歡迎。心內想講：好事來，歹事煞，真佳哉。

　　今日早起參朋友去四湖、北港辦代認，辦煞帶我去新港南壇較過一間頂菜園鄉土館，內底收藏真濟古早物，上稀奇有三項，第一是主人寫的七字仔詩貼佇沿路的電火柱頂，對世事的描寫閣寫了真鬥搭。第二是看著較罕看的物件，像花轎、馬車、糧食局的粟倉桶、用電火柱起的厝………。第三是有義工穿棕蓑背魚籃仔彈月琴、彈吉他。

　　感心的是主人為鄉土文物用心留存，閣真有量，來參觀的免錢，有認同才請消費。我想一定愛共人紹介鬥宣傳，有機會嘛欲帶朋友、人客來。心內嘛咧按算揣一工邀請較知己的朋友做陣來。看遮的嫷光景，順紲聽月琴演，奏我來念33、常文、參我的詩予逐家聽看覓。

　　趕轉來厝已經一點過，趕緊食中畫，因為點半欲愛去參加抄經比賽。拄出門佇巷仔口，雨傘吊咧鐵馬手按（huann7音岸）仔，車一捒，手按仔一斡，雨傘共輪仔咬椆咧，車煞行未振動，人煞佇鐵馬頂拋車輦（前翻滾）摔落來。我隨唯土跤爬起來，佳哉無人看著，想欲行才知落鏈，舞一下囝舞未好，隔壁做美髮仔查某老闆聽著「碰」一聲，走出來問我車痞（壞）去否？

　　換一台鐵馬趕去安慶國小，牽手佇遐等一睏，我毋敢講。大悲咒抄了，聽「薩克斯風」演奏老歌，落尾頒獎，阮翁仔某攏無著獎。牽手講伊寫了未痞，我嘛講我也是寫予未痞，兩人笑哈哈行出學校，評審一定看霧去。

　　轉來厝，手摸左手爿排仔骨疼疼，這聲慘嘍！我苦！牽手提雨傘欲閣出門，雨傘展開看著破幾何空著問：「嘿！人，按怎閣挵害去！」啊，亦是坦白招認，閣來汝應當會了解，一定是………….。

　　下暗去中醫遐看，司傅一摸這搭疼彼搭疼，伊講毋敢大的推，先貼膏藥消炎，中醫師嘛有開藥仔………。

　　唉！無三不成禮，歹事閃嘛閃未過，三煞準準！啊！好事咧？敢亦有三喜？