珠寶無跤會走 

今年國中基測國文閱讀測驗，有一條文言文題目出自《說苑》卷八《尊賢》，末學就用台文來試寫這篇文章的意思。文章原本是按呢：

「趙簡子游於河而樂之，歎曰：「安得賢士而與處焉！」

舟人古乘跪而對曰：「夫珠玉無足，去此數千里而所以能來者，人好之也；今士有足而不來者，此是吾君不好之乎！」

趙簡子曰：「吾門左右客千人，朝食不足，暮收市征，暮食不足，朝收市征，吾尚可謂不好士乎？」

舟人古乘對曰：「鴻鵠高飛遠翔，其所恃者六翮也，背上之毛，腹下之毳，無尺寸之數，去之滿把，飛不能為之益卑；益之滿把，飛不能為之益高。不知門下左右客千人者，有六翮之用乎？將盡毛毳也。」 

用台文翻譯書寫是按呢：晉國的國王趙簡子佇黃河上船佚陶（遊玩），一路遊山玩水非常歡喜，煞雄雄吐一下大氣感嘆講：

「唉！欲去佗位揣會著賢（音爻）人來幫贊我咧？」

船夫古乘聽著隨跪落來稟報講：「海裡的真珠，山底的寶玉無生跤，雖然離遮幾仔千里，閣較遠攏會當集倚來，是按怎？因為汝真心疼惜伊啊！現主時，賢人有跤毋肯來，這大概是主君汝愛惜人才的心亦無夠，毋知影怹是啥乜（什麼）種的人才，欲予伊按怎的發揮吧！」 

趙簡子講：「我那會無愛惜爻人咧？我門下為我獻策走傱的讀冊人有上千人，早起頓若無夠食，下晡我就隨去市場抾稅（徵稅）：暗頓若無夠食，早起時仔就隨去市場抾稅，敢講按呢我猶無疼惜怹？」

古乘講：「像大鵬彼種大隻鳥仔一展翅就會當飛足懸、飛足遠、飛幾何千里，倚靠的是翼股頂的六枝大枝骨。伊尻脊骿粗粗的毛、腹肚下面幼幼的毛，並無偌厚，挽一簇仔掞掉，未因為按呢飛了會較低一寡；若是加一簇毛起去，嘛未因為按呢飛了會較懸一點。毋知汝門下遐的成千個賢人，是大隻鳥仔翼股頂的大枝骨？亦是尻脊骿、腹肚下面粗粗幼幼的毛爾！」 

不脛而走，「脛」是華語「小腿」的意思，台語叫「下腿」、「跤胴」。「不脛而走」這句話，本來是這個故事「珠玉無足」伸長變化來的，用來比喻物件毋免宣傳、推廣，也會真緊就傳遍出去。

好牛也著好犁手，假使毋捌寶，扁擔削做尺，好琵琶掛佇壁頂，好衫褲下佇櫥仔內，好好花插佇牛屎頂，勇勇馬縛佇將軍柱，就真拍損、無彩。頇顢頭家，無精明辛勞，未曉慧眼識英雄，賢人按怎會擒倚來！