夜半鐘聲 

「月娘慢慢徙對西爿的山嶺沉落去，烏鴉發出啼叫的聲音，滿天罩著白茫茫的寒霜，江邊的楓仔葉予風吹甲搖來搖去，漁船一葩一葩的燈火，恬恬對著心悶睏未去的我。蘇州城外的寒山寺，更深半暝的鐘聲，一聲閣一聲傳到我歇睏的帆船內。」這是唐朝張繼的詩作〈楓橋夜泊〉－月落烏啼霜滿天，江楓漁火對愁眠。姑蘇城外寒山寺，夜半鐘聲到客船。

         寒山寺因為這首詩出名，嘛變成千古以來的遊覽勝地，到今猶原有濟濟的人千里迢迢欲來聽伊的夜半鐘聲。寺院的鐘聲嘛因為這首詩得著注目，寺院叢林的鐘聲變做詩人熟似的清音。中國詩詞作品內底，真濟提起著鐘，像王維的〈過香積寺〉：「不知香積寺，數里入雲峰。古木無人逕，深山何處鐘。」劉長卿的〈送靈澈上人〉：「蒼蒼竹林寺，杳杳鐘聲晚」等等。

佛門每工早暗敲鐘擂鼓，用來警策行者精進用功。「晨鐘暮鼓」，的意思是指一工的時間，或者比喻使予人警覺、醒悟的力量。「晨鐘暮鼓」字面上的意思是早暗敲（ㄎㄠ）鐘擂鼓，毋通掠做是透早時仔摃鐘，下暗時仔摃鼓。講較詳細的，是透早時仔先敲鐘，接落來才擂鼓。透早時敲鐘擂鼓先緊落尾慢，緊，敲十八下，慢，敲十八下，為一陣，重複三陣總共一百零八下。暗時仔是先擂鼓，接落來才敲鐘，先慢落尾緊，共款是三陣一百零八下。敲鐘一百零八下，表示破除一百零八個煩惱。

佛門有一個講法，佇寺院聽著早暗的鐘聲，除了發病的人，倒咧的人一定愛跁（爬）起身，手合掌發善心或是打坐、念佛。用意是喚醒咱毋通放蕩，愛搰力用功，遠離著生死輪迴的長暝。

「做一工的和尚敲一工的鐘」，是勉勵咱人，無論做佗一項代誌攏愛用心，像出家人領著敲鐘的執事，嘛是愛誠心、懇切、認真來敲鐘。一下鐘、一下鼓，攏是有一定的規矩，一板一眼，一面敲一面虔誠祝願，未使精差（誤差），未使凊凊彩彩（馬馬虎虎）。

我記持內底，干礁有一擺聽著早晚鐘鼓霆（響）參師父唱叩鐘偈的聲，上數念，算算咧已經是20外冬前的代誌啊，印象猶閣足深的。有一回，阮虎尾的蓮友相招去埔里佛光寺朝山，到山門的時閣咧落雨仔，逐家煞面憂憂汝看我，我看汝，躊躇毋知欲按怎好，一位林老師就講：「既然是欲來朝山，落雨嘛著朝山。」講煞簡單雨衣幔咧就行落車，我輸人毋輸陣嘛綴（ㄉㄨㄝ！跟隨）伊後壁落車，車底的人嘛一個一個綴落車。逐家隊伍排好勢，逐家佛號念出喙手提的小鐘一摃，開始三步一拜向前行，大約拜20外分鐘雨就停，逐家閣繼續拜，到了大殿才做三皈依、回向結束，一路拜的時間好親像是點半鐘，人足悿（累）的，彼暗佇寺院內底的寮房過暝。

透早三點半就予拍板的聲叫起，趕緊起床摺棉被、穿衫、上便所、洗喙洗面，海青穿咧就行去大殿，天亦暗摸摸，拄聽著鐘聲，隨看著一位老比丘佇大殿外咧敲鐘，而且大大聲咧唱叩鐘偈。伊的聲音低沉，不過足響亮，唱懸的時陣有一屑仔破叉聲，像獅咧叫，予人的心真大真大的衝擊佮震動。

「願此鐘聲超法界，鐵圍幽闇悉遙聞，聞塵清淨證圓通，一切眾生成正覺。」…….「洪鐘初叩，寶偈高吟，上徹天堂，下通地府。」鏗！…………..「仰願佛日增輝，法輪常轉，虔祝民圖宏固，國道遐昌。」鏗！……按呢一偈一偈唱落去，總共有十八句，敲鐘十八下。一面唱，一面發願，一面禮拜。彼的時陣，觸彼個景，聽著師父的唱偈，親像是一位離塵菩薩悲愍的呼喚，我的善根流露，想著浪子的我猶佇三途奔波，一時心酸目屎現輾（滾lin3）落來。

 寒山寺的「夜半鐘聲」出名了後，嘛發生一層上趣味真有意思的論戰。宋朝出名的文學家歐陽修佇《六一詩話》這本冊內兜指責張繼「貪求好句而理有不通，亦語病也」，質疑講：「三更半暝那會是摃鐘的時陣？」認為是作者寫作時，為求嫷的句讀參事實相違背。毋過，伊的指責並無受到人的贊同。南宋文人葉夢得佇《石林詩話》內底講：「蓋公未嘗至吳中，今吳中山寺實以夜半打鐘。」《唐詩紀事》嘛講：「此地有夜半鐘，謂之無常鐘。繼志其異耳，歐陽修以為語病，非也。」講蘇州、杭州彼搭的寺院，確實有佇半暝十二點敲的情形，而且到宋朝猶原閣有半暝咧敲鐘，未當講張繼「理有不通」。半暝十二點敲鐘叫做「無常鐘」、「定夜鐘」、「夜半鐘」，用意是提醒世愛珍惜光陰，好好仔把握時間，像佛門暗課念的偈「時日已過，命亦隨減，如少水魚，斯有何樂，大眾當勤精進，如救頭燃！」。

有人對這首詩的看法是，詩人一暝無睏，驚伊是恍惚將透早的鐘聲誤認做「夜半鐘聲」？一來佛門少有半暝十二點敲鐘的做法，二來有人指出半暝進前無可能會「霜滿天」，應當是佇透早氣溫上低時陣的景象，何況是天扑昲光烏鴉才會開始叫啼，汝想咧？毋過，古詩內底確實有影真濟夜半鐘聲的詩句，我認為張繼的詩佮景是真正的！