鬱悴的心情 

有一位人客先來電話約我早起欲來，我知影奚是老顧客才會按呢，較特殊愛我共服務的，我驚伊來拄我請假，代理的人無法度處理，我會交代下擺來，先拍電話參我約。老實講，有的空課較複雜，若毋是有經驗閣肯用心，是無法度共服務的。

伊來的時，已經欲倚中晝下班，了解伊的問題，閣去找伊的舊案資料，第一擺來時是因為怹翁空課毋做四界浪蹓嗹，欠卡債定定人咧討，嘛捌無錢共人偷提物件夆判罪，欲食毋討趁，干礁欲靠領低收入戶的補助金過日子，領著補助金嘛毋予怹母仔囝生活費，伊閣著愛照顧三個囡的生活。伊是大陸嫁來台灣的，遮無親無情，大家官蹛嘉義無啥愛插怹母仔囝，為著討生活費來服務台，我共伊寫調解聲請狀，閣紹介伊去家扶中心找看會當得到扶助無，彼陣伊亦未提著身分證，我勸伊忍耐。

第二擺來，是欲告離婚，頂幫調解給付生活費，怹翁講無錢好予伊調解無成立，伊認為怹翁按呢無責無任，婚姻無法度維持。伊未曉寫繁體字，局不局照伊所講的共寫了訴狀，無錢通繳裁判費我閣替伊寫了聲請訴訟救助狀。開庭怹翁毋肯離婚，生活費嘛毋予怹，尾手落庭怹翁講欲參伊離緣，叫伊先撤回訴訟，伊撤銷了，怹翁無欲參伊去戶政辦離婚，伊才知予騙去。印象上深的是伊並無想欲爭取囡仔的監護權，我心內有淡薄仔未諒解。

我講十二點到我愛下斑，寫狀紙最少愛半點鐘，下晡一點二十分我愛準時上班，知影伊無啥錢，提50元請志工去餐廳包一個便當予伊。

一點二十分伊講家扶有約伊講代誌欲先去，我趁共人服務的空縫，幫伊用電腦拍字寫訴訟離婚佮聲請訴訟救助二份狀紙。四點伊來，看戶籍謄本才知伊提著身份證，我將狀紙內容念予聽，閣聽伊的意見修改。我特別提起囡仔的監護權敢無欲爭取，如果欲，愛做一擺，囡仔是無辜，老父無愛，老母若是毋挃，未免太可憐！

伊煞目屎輾落來，伊講我毋是無愛囝，是無能力照顧囝，離婚了後我愛稅厝，無做空課未當生活，欲做空課上細漢囝亦未上小學，讀幼稚園閣赫貴

，我毋知欲安怎？原底有想共囡仔送轉去大陸予序大人照顧，伊專心趁錢拍拚，聽講按呢未使領低收入戶補助金。

    我心內真艱苦，艱苦囡仔的不幸，大人總是愛當忍耐找活路，囡仔煞無家己選擇的餘地。伊走了，我參家扶伊的社工師聯絡，了解家扶幫助怹的情形

，社工師有講欲閣一個月加三千元的特別補助予伊，期限是一年。我按算明仔載參怹管區的查證一下，如果確實怹翁是按呢生，會向同仁組成的愛心社聲請濟助一萬元。

    後月初一我就正式退休，想著一寡艱苦人未當閣共服務，心肝規個鬱悴起來，退休令嘛准落來阮的機關嘍。唉！無奈的人生。