教育部國語詞典是按呢寫：「七情，指喜、怒、哀、懼、愛、惡、欲七種情感。六欲，指從眼、耳、鼻、舌、身、意（意念）產生的六種欲望。總稱人的情感和欲望。如：『人都有七情六欲。』

七情，《禮記》禮運篇將「情」分做喜、怒、哀、懼、愛、惡、欲七種感情的作用。《釋氏要覽》則列有三種說法，或指「喜、怒、哀、懼、愛、惡、欲」；或為「喜、怒、憂、思、悲、恐、驚」；或指「喜、怒、憂、懼、愛、憎、欲」，皆為人之情感細分種類。 

「喜」是快樂。「喜」予人「心花開」。「怒」是受氣。「怒」愛用「包容」來敁（解開）。「哀」是無歡喜，嘛叫做「傷心」。「懼」是驚惶。「懼」是「提心吊膽」。「愛」是疼愛。「惡」就是睨神。「惡」予人感覺未爽快。「欲」就是向望。「欲」若傷濟（過多）會變成「大心肝」。為中醫講是「喜、怒、憂、思、悲、恐、驚」七種精神狀態，若卡超過，會致使內傷。 

     「七情六欲」一語，「七情」典故出自儒家，「六欲」是出自佛的經典。「六欲」根據《大智度論》卷二的記載，是指一般人對異性所具有的六種欲望：「色欲、形貌欲、威儀姿態欲、言語音聲欲、細滑欲、人想欲。」即六種欲望，會使人產生貪欲之心。 

一般佛教卡捷（常）講的是指「眼、耳、鼻、舌、身、意」六根所產生的欲望，就是目睭所看見的物、耳空所聽的音聲、鼻仔所鼻的芳、舌所感覺的味、身軀所接觸的感覺），眼、耳、鼻、舌、身即五種器官接觸所生的欲望，透過內心的執著起了貪愛，想卜得到手的欲望。五欲另外嘛有講是貪財、好色、愛好名、貪食、貪睏。 

佛法稱呼人所蹛（居住）的世間，叫做「有情世間」，稱呼人類佮一切生物叫做「有情眾生」。稱做「有情」，是因為一切性命的生存活動大多數是以情識、慾望為運作。凡若是人，就離未開七情六欲。七情加上六欲，咱的心若傷過頭執持毋放，就會予六欲勾著，落入欲望的萬丈深坑，真歹會當脫離，煩惱、痛苦就綴（ㄉㄨㄝ！跟隨）咧來，得未著自在。 

情，通常上趣味的是「愛情」，俗語比喻的有「愛到，流目油」，「愛到，流喙瀾」，「嗄著，頂八卦」，「嫷醜無地比，合意卡慘死」，「犀牛，照角（眉目傳深情）」，「四目相對亂紛紛」，「半壁吊肉貓跋死，看有食無病相思」，萬一若予失意，變做「目屎佮操煩」。

    愛，俗語比喻的有「生愛有人惜，死愛有人哭」。「抱狗過戶碇也愛錢」，「目睭看斗概，看人物著愛」。 

惡，包含妒恨怨慼，俗語比喻的有「笑人窮，怨人富」，「怨人大尻川，笑人面無肉（妒富艷，賤貧醜）」，「家己未肥，嫌人跤肚生肉」，「人咧食米粉，汝咧喝燒」，「睛暝，怨壁（自己不好，遷怒別人）」，「死，目毋願契（死不瞑目）」。 

    喜，俗語講「心涼，脾土開」，「三跤走，兩跤跳」，「歡喜到，獅尾舉半天懸」，「魩仔魚食著皇帝肉－暢到無鰾」。

    哀，悲傷、艱苦。俗語比喻的有「講起來，天烏一爿（一言難盡）」，「心肝，宛如彈月琴（心彈哀歌）」，「啞口，矺死囝（有口難言）」，「目屎，流對鬢邊出來（冤屈難伸）」，「卜哮無目屎，卜哭無路來（欲哭無淚）」，「一滴目屎，三斤重」，「哭到，有天無日頭」，「卡慘孟姜女，哭倒萬里長城」。 

　　怒，俗語比喻的有「鬚聳，目降」，「指天，突地」，「雞母，跳破卵（暴跳如雷）」，「氣到，鼻空空殼」，「腹肚內，沖沖滾（火冒三丈）」，「見笑，轉受氣」，「抾無屎，摃死牛屎龜」，「無米拍鼎，無錢拍囝」。

　　憂，俗語比喻的有「一日煩惱日落申，一暝煩惱雞報寅」，「彌勒喙笑，肚內憂（笑臉藏憂）」，「目眉，拍結球（愁眉深鎖）」，「臭尻川，畏人挖」。 

　　懼，驚也，俗語比喻的有「驚到，起雞母皮」，「驚到，跤浮手閃」，「驚到，滲屎泄尿」，「驚到，破瞻膽」，「十二條靈魂掙一間」。

　　色情、慾望，俗語比喻的有「七情六欲，不學自通」，「色膽，包天」，「孔子公，毋值著客兄公（重，色不重文）」，「有人興燒洒，有人興豆腐」，「枵狗，數想豬肝骨」，「枵貓，數想水底魚」，「老牛，想食幼菅筍」。