誰是你的囝

北宋蘇軾翁某情深，牽手過身十冬，猶原寫出感動千古的《江城子》來思念伊。

原文：「十年生死兩茫茫，不思量，自難忘。千里孤墳，無處話凄涼。縱使相逢應不識，塵滿面，鬢如霜。夜來幽夢忽還鄉，小軒窗，正梳妝。相顧無言，惟有淚千行。料得年年腸斷處，明月夜，短松岡。」

意思是講：「十年矣，別世的你，見袂著我；偷偷活咧的我，見袂著你。免刁故意去想你，甜蜜的記持嘛袂拍毋見！想著你的墓園，孤單徛佇千里外，無底講起我內心的稀微。假使有一工九泉相逢，你嘛認袂出我啦！我已經滿面風塵，鬢毛結白霜嘍。昨夜，睏落眠的夢中，忽然間轉去故鄉，你恬恬坐佇窗邊梳妝，你我相相，無言無句，只有目屎四湳垂！每年予我割腸割肚的，就是這款冰冷的月暝，就會想起種了三萬細叢松樹的小山崙，你蹛的彼的所在！」

「假使有一工九泉相逢，你嘛認袂出我啦！」相逢不相識，何等淒涼！

聽法師講起一个故事：一个疼囝疼命命的老母，佇囝不幸別世了後，一聲天，一聲地，一聲母，一聲父，逐工想囝哭甲死來活去，有夠痛苦傷心！

伊思思念念，求神問佛向望夢中佮囝相見。誠實，伊夢著心肝囝。佇遠遠的所在，騎著一隻白馬對伊這爿衝過來，一時仔就倚近身邊，伊大聲喝阿囝的名，伸手欲共搝（giú）。

啥知，騎佇馬頂的囝，煞攑起馬鞭向伊捽來，兩蕊目睭大大蕊對伊睨，凊頭凊面講：「誰是你的囝！」

伊的囝騎著白馬，無斡頭、無講啥，一直走遠去，彼个疼囝疼命命的老母，夢中拍醒，人神神心驚惶，也傷心也嘆氣，複雜的心情無底通講起。

法師問逐家：「佇無盡無窮的生死輪迴當中，誰是你的誰﹖」

是啊！無盡無窮的生死輪迴中，佗一个才是真正的我，父母袂生我進前我是誰，我若過身，我閣是誰﹖

佛法講「隔陰之迷」，咱人過身之後，神識若投生轉世，對前世種種因緣遭遇，懵懵懂懂，攏會毋知半項，嘛會袂記生前的父母妻子眷屬朋友。所以生死隔離一翻身，誰閣會記得早前誰是誰！

有緣即住，無緣即散，因緣決定了人佮人的關係，嘛決定了緣分的深淺、長短。當緣盡的時陣，各人有各人的路愛行，互相調整各人的心境，深深的祝福之外，毋免過頭悲傷！

人若過身，就毋是原底的伊，伊嘛袂認得咱，咱何物苦為伊掛吊淚不止。

後記：故事及小部分文字譯自釋見介法師《和佛陀談天說地-誰是你的孩子？--一個馬背上的公案》