諺語    三月痟媽祖
　　

這句話，是指台灣每年農曆三月初開始，就進入媽祖的香期，媽祖廟佮媽祖的信徒開始咧鬧熱無閑，其中閣以連紲八工七暝、長大約300公里的大甲媽祖遶境進香活動上蓋有規模。大甲鎮瀾宮佇每年元宵節暗時跋篦（擲筊、擲筶）決定起駕日子，超過十萬人參與的起駕、返駕典禮，會使講人揳（擠）人、沖沖滾，老人食麻油－鬧熱。

　　人講：三月痟（瘋）媽祖，如果汝想卜知影這是啥麼感覺，汝就一定愛來看看北港媽祖出巡，因為北港人對媽祖的熱情，真正會予汝永遠難忘，因為北港人會用"炸"的方式來表示對媽祖的崇敬之意，按怎炸咧？北港人會用一大堆的炮仔（毋是干礁一串兩串喔！）來炸媽祖的神轎，北港人講這是"炸轎"，也有人講這是"食炮"。汝知否，當神轎下面的彼堆炮仔點著（點燃）的時陣，剎那間火光四起，滿天煙霧，聲音大甲像響雷，炸完了後，天公頂就會下落炮屑仔雨，當炮屑雨飛落滿四界的塗跤兜時，四箍輦轉就會響起歡喜讚嘆的喊喝聲，哇！奚是真正有夠爽快啦！遐的扛轎的勇士對濟濟的炮仔一點攏無驚惶，不動如山護著神轎，真使得人敬佩！炸轎炸轎，炸出了北港人對媽祖的虔誠，汝有機會無妨親親來體驗看覓！