婚禮的祝福

新郎、新娘恭喜！各位貴賓、各位兄姊平安順序食百二！佇則爾莊嚴，則爾盛大的佛化婚禮當中，逐家號齊同怹祝賀，相信怹會當感受夠無比的光采，會當互遮濟人欣羨、呵咾、佮祝福，是怎樣的福氣，何等的榮幸，毋通未記眾人誠懇的祝福。

古早人講：「無婦不成家，無夫不成室」，「五百年前，姻緣天註定」，「共桌食，共床睏，嘛是緣份」，兩位新婚翁仔姐，選擇了良辰吉日圓婚、而且佇濟濟眾人面前見證之下完成了終身大事。這表示怹願意今生今世各盡本份，互相接納，互相扶持，互相勉勵，互相體諒，彼此參詳、尊重、關懷，恩恩愛愛，幸福夠百頭。

　　唯法律的觀點，結婚是一男一女，兩人同時陣認同對方是唯一的愛伴，將此永遠永遠，做伙拍拚生活為目的所建立的契約，是家庭責任以及家庭義務的肯定佮承擔。婚禮乃是人生的大禮，結婚變做一層神聖的責任，高尚的義務。即然怹決定了卜手牽手共度人生，就毋通將機會讓互別人！美滿的家庭生活建立在雙方的德行，親像信仰、思想、性格、見解等一致的基石上，所以婚姻路上必需要用心經營，夫妻的感情，除了珍惜，也是珍惜！

而婚禮是怹兩個人向世間、向天地、向對方佮家己，彼此的宣誓，無論佇什麼時陣，發生了什麼代志，也會心連心鬥陣行仝步！不只是對另外一半的承諾，也是對家己的承諾。不只是愛真心疼痛，佫需要對家己的選擇負責，選家己所愛，愛家己所選，愛伊一世人。

　　唯文化的觀點，兩姓因為婚禮的結合成為夫婦，建立了新家庭，成為社會佮國家的基礎。代表了繼承前人的血脈，而且將香火一代一代生湠相傳，表達了人倫義理佮生命的意義。所以結婚嘛不只怹翁仔姐是男女兩人的代誌，對祖先、對後世囝孫、對家庭社會，攏有一種使命，一種義務，互結婚變成一層終身大事。