狗無嫌主人散－狗年談狗

時常有人提起：「狗仔是人類上忠實的朋友！」歸欉好好－無剉。

英國文學家阿道斯，赫胥黎講了一句話：「每一隻狗的心目中，伊的主人就是拿破崙。」狗仔，伊用上真的感情對待伊的主人－人類。

人類的歷史學家曾經佇研究中發現，早佇一萬五千年前，伊就出現人類的生活之中，是地球上上早佮人類共同生活，而且有友誼來往的動物。會使講：「狗仔是人類上久長、上親近、上忠實的良伴。伊比其他動物馬、豬、貓、雞、鴨無共的所在，是伊對人類友好的天性。」當伊對主人信任倚靠了後，對主人絕對忠實對待，想盡辦法表現、回報，予主人得著歡喜。

毋過，若是講「人類是狗仔上忠實的朋友」，啥人敢大膽應講「是」！答案一定是「人類絕對毋是狗仔上忠實的朋友」，也真有可能煞變成「人類是狗仔上卑鄙的朋友！上可怕的敵人！」當咱需要伊的時陣，伊是咱上好的朋友，當無需要伊的時陣，伊是「臭頭雞仔，無人緣」，甚至是「老鼠泅過溪，人人喝扑。」

如果伊是咱的忠實朋友，應當參伊相依為命，永遠未放捒、未傷害伊、未出賣伊！伊閣按怎醜，按怎發病殘廢、狼狽，猶原未變心，好好仔對待，照顧伊，善其生，善其終。狗並毋是伊自願卜流浪，未使講伊是「流浪狗」，伊是予人放捒！每一隻夆放捒的狗仔，伊原本的主人的良心嘛予放捒去！

人是依萬物之主的心態咧主宰萬物，將萬物當做「佚陶物（玩具）」，用了就掞，頭仔興興，尾仔冷冷，耍了就煞！人有權利選擇卜愛佗一隻狗仔，狗仔煞無權利選擇家己的主人，伊只有順受、順從，按呢敢有公平！

人類自認是萬物之靈，認為人類才有道德仁義，人類才有文化，人類才會互相合作，人類才會和平共處，畜生並無即個本事！奚攏是無知的妄言，就親像「烏人毋是人」共款譀古（荒謬）！

狗仔的性命中，將愛一點仔就無保留，全心一意奉獻予伊的主人，連犧牲性命嘛未躊躇！「狗尾搖圓圓，人尾看未見」，咱對人好，別人無一定對咱好，「飼狗捌主人」，汝對伊好，伊對汝閣卡好。伊對主人的好，是知恩報本，是有情有義，最少「予狗食也會搖尾」。歡喜時疼命命，無愛的時跤掙拳頭、卜刣卜割，「麻糬手內出」，隨心所欲。若棄嫌伊的時，未去思考伊對人的好、對人的恩惠，伊是赫呢仔忠實，有時陣人煞反背伊、出賣伊，甚至「愛食狗肉未得狗死」！

當咱咒罵別人禽獸不如的時，人有時比狗亦卡禽獸不如。人會忘恩背義，狗仔有汝對伊有淡薄仔關懷，伊就真滿足，「戇狗咬破紙」是伊的單純可愛，伊絕對未「飼狗咬主人」。閣再講，狗對困境的勇敢面對，有時咱人亦自嘆不如！

人罵人，無代無誌提狗仔來比喻，嘛真無道理，像「走狗」、「狗兄狗弟」、「狗傍虎威」、「狗頭軍師」、「豬狗不如」、「人群狗黨」「陰沉狗、咬人未哮」、「人心狗腸肚」、「狗頭老鼠耳」、「狼心狗行」、「豬狗禽獸」、「豬狗猙牲」、「差豬差狗不值家己走」，華語的「狗腿」「狗眼看人低」，攏是對狗仔充滿了偏見、輕視佮侮辱！

人愛反省的是對動物的輕視，人毋但愛用理性佮良心的觀點平等相待其他的動物，閣愛優先重視怹是有痛苦佮歡喜的感受能力，怹參草木石頭無相仝，怹參人共款有血有肉有情有愛，知苦知快樂，驚迫害、驚死亡。怹經常活踮虐待、痛苦、哀叫、減絕當中。咱對動物應當愛有「平等尊重」的認捌，台灣的「狩獵計畫」、有錢人穿著「皮草」展寶（動物是被屠殺剝皮）、大陸贈送台灣「猫熊」（講好聽是表示兩岸愛佮和平，若是真愛應當是野放轉起伊自底所蹛的所在，監禁就是殘忍）、被放捒的狗仔貓仔滿四界、流浪狗被捕殺、鋸鹿茸、活體解剖、馬戲團等等，值著咱去關心、反對。

咱對動物的殘酷，相信對人嘛會共款赫呢仔殘酷。假使咱無卜以仁心對待動物，漸漸咱對家己的慈心會愈來愈痲痺，害人、拍人、刣人攏會當做理所當然的代誌！

用另外一個角度，換做汝是狗仔，汝希望人類按怎對待汝，汝是按怎想咧？話講一大拖，若無人信道，嘛是「狗吠火車－無彩工」！來！請汝來看狗仔的故事，輕鬆趣味卡實在！


卜死的狗仔
有一個做生理人，有一工帶著伊飼的狗仔出門收數（帳）。

轉來的路裡，天氣翕熱，生理人就佇路邊的大樹跤歇困啉茶。當卜離開的時，狗仔煞對主人吠未停，主人無卜插伊，伊就咬主人的褲跤毋放。

生理人真受氣，叫伊放，伊亦是毋放，生理人佮狗仔揪揪搦搦一陣仔，生理人受氣甲擋未椆，就舉樹仔枝摃狗仔，狗仔亦是毋願放，生理人起粗殘大力一直扑，扑甲狗仔重傷倒踮塗跤，卜死但哼（奄奄一息），生理人才氣怫怫離開。

等到生理人行了一段真遠真遠的路，發覺錢包失落去，想仔想才想著錢包是落佇拄才歇困的樹仔跤，卜起程的時陣，未記得紥。

即個時陣，伊才覺醒，迄隻狗仔是咧提醒伊物件扑交落，無將錢包紥走。家己毋知煞糊里糊塗白白共狗仔冤枉，閣共伊拍成重傷。生理人愈想愈歹勢，亦狂亦急，心內誠艱苦，走轉來到原所。狗仔倒佇樹跤，賰一個氣絲仔咧塌（neh4收縮、凹入）爾，毋過亦是真忠心覆踮錢包頂懸無離開，狗仔無奈痛苦的眼神對主人看一下，大聲喈（kainn呻吟叫苦聲）一聲，就死去啊。

跋落湳塗的書生 　
古早有一個姓楊的書生，飼著一隻疼命命的狗仔，一工暗時伊拜訪朋友了後卜轉去厝。佇半路無細膩，人煞跋落大溪溝底跁（爬）未起來，伊飼的狗仔佇溪溝邊，一直吠無停，等看有人來救伊的主人無？

一直等到兩點外鐘，才拄著一個過路人，過路人感覺誠奇怪，倚近溪溝一看，原來是有人跋落溪溝的湳塗（泥淖）內咧喝救人。

楊書生大聲對迄個人講：「請汝趕緊解救我！我一定會好好仔報答汝。」迄個人講：「如果汝答應將狗仔送予我，我就救汝起來。」楊書生講：「狗仔是我救命的恩人，我那會當忍心送予汝，除了狗仔，田園厝宅汝卜挃啥，我攏答應。」

迄個人講：「好，汝若毋將狗仔送予我，我就無愛救汝，失禮，我卜來走矣」！講完伊就卜離開，狗仔趕緊對溪溝底的主人一直吠，楊書生知影狗的意思，就趕緊共迄個人講：「喂！喂！好啦！我就共狗仔送予汝，汝緊將我救起來！」迄個人就揣著索仔，將楊書生揪上岸，然後共狗仔的頷頸用索仔溜咧，將狗拖轉去啊！

事後，楊書生一直自責家己無應當恩將仇報，將救伊的迄隻狗仔送予人。第五工的暗時，忽然間佇半暝仔聽著狗仔拍大門的聲，伊足歡喜緊共開門，伊所疼惜懷念的狗仔，踜（掙脫）開索仔的束縛，毋知揣偌久行偌濟的路，走轉來伊的厝。
楊書生拫拫（緊緊）抈著狗仔，流著歡喜的目屎！

狗救小主人 　
海口有一戶散鄉人，主人叫阿彰。一工阿彰怹翁仔某攏出去做工，干礁留一個五歲大的查某囝佇厝。

即個查某囝佇厝內佚陶，閣走到門口埕佚陶，後來耍球的時，球煞走落埕邊的窟仔底，查某囡仔一下無細膩卜迮球，人煞綴咧跋落去水窟仔底。

厝內的狗仔看著，趕緊跳落去窟底將查某囡仔救上岸，毋拘，查某囡仔食水過濟，人煞昏昏死死去。狗仔將查某囡仔拖入厝來，將草蓆仔舒踮塗跤，閣咬一條毯仔共蓋（kah4）咧，用舌將囡仔的面佮頭毛的水舔予凋。

隨閣一直走，走到阿彰做空課的所在，大聲一直吠，吠甲真兇。阿彰一看，知影其中必有因，趕緊三步做一步趕轉來厝，看著查某囝規身軀澹漉漉倒踮草蓆頂，賰一屑仔氣絲仔，阿彰隨時做急救，過一暫仔才救回查某囝一條命。

青瞑的狗仔 　
成溪的所在，阿童怹厝飼兩隻狗仔，一隻是白的，一隻是昲〔phu2灰〕的，是共一隻狗母生的，誠伶俐，知影主人的心意。

後來白狗目睭青瞑，摸無路入去狗椆食食，主人就佇狗椆外口另外舖一領布袋，埾〔cu 墊〕踮塗跤兜予睏，昲狗仔逐頓就咬物件來飼白狗仔，亦閣暗時嘛陪伊睡踮外口，按呢一直到白狗過身。

主人將白狗埋踮山跤，昲狗仔逐工猶是走去白狗的墳地幾何擺，佇墳墓四周圍踅圓箍仔，有時閣若親像誠悲傷覆佇墓邊哭，若像行未開跤，等到天真暗才轉去。

思念主人的狗仔 　
佇中國時報捌看著一篇報導：美國德克薩斯州加地斯市，有一間波托迪馬病院，七年來有一隻叫「卡尼洛」的狗仔一直佇病院的門口踅來踅去，毋願離開。
因為伊的主人七年前心臟病送來病院急救無效別世，卡尼洛到今猶咧聽候主人出院。醫護人員叫伊走，伊猶是毋肯離開，七年來受著感動的醫護人逐工飼迄隻盡忠的狗仔，前規日護士閣用新紙箱為卡尼洛換新厝。

另外一個小可相像的故事：是佇日本東京的郊區，有人飼一隻狗仔，每一工早起，狗仔就歡歡喜喜，跳來跳去送主人上火車入城去上班。尾暗五點半，狗仔就尾溜搖咧搖咧去車頭迎接主人轉來。

一工，主人因為急病佇城裡過身，從此以後規十年中間，迄隻狗仔猶原逐工按時間去車站接主人，閣再頓垂頓垂行轉來，透風落雨嘛無佇，按呢一直到迄隻狗仔年老死去。


狗仔紀念碑　　
澳洲的雪梨是美麗的海港，來自世界各地的旅客會使講是挨挨陣陣，雪梨海邊懸懸的斷崖頂面，徛著一座狗的紀念碑，予人知影即個所在曾經有一隻體貼人意的狗仔，提醒著遊客愛珍惜性命的可貴！

佇即片水璫璫景色的斷崖邊，有濟濟觀光客佇遮遊覽，嘛有一寡人是心情鬱悴卜來跳崖自盡的，當時的資本主義社會，厝、自動車、電冰箱、冷氣真濟攏是分期付款買的，若萬一失業，無錢付款，遮的物件攏會予資本家收回，牽手定定嘛走無去，失業的打擊，感嘆人情泠暖，世態炎涼，無蹛咧生存的勇氣。

斷崖附近有一間細間旅館，旅館的老闆，飼著一隻聰明伶俐的狗仔，伊看過未少跳海自盡的人，久來就學會曉看目色（察言觀色）。若見著人客是歡歡喜喜佇遐佚陶，伊就放心四界走來走去；如果看著憂頭結面的人坐踮斷崖對著大海，伊就趕緊走轉去旅館，帶著主人來，對卜自盡看未開的人好言相勸，就是按呢救了未少的人。

狗仔死了後，在地的人為了紀念伊的義行，就佇斷崖頂為伊徛了即座紀念碑，像伊佇遐咧苦勸世人珍惜性命。

狗仔寄批 　
以前佇歐洲某一個所在，有一隻狗仔會幫主人咬批去大路邊的批筒寄。
有一工，主人閣有幾何張批叫狗仔咬去落〔lok4 投〕，結果真想未到，狗仔轉來的時煞閣咬著一張批，主人接過批一看，原來批是落〔lau3〕溝無貼郵票。


忠犬救主
一個秋天的暗暝，山區有一戶人家厝，四個朋友弟兄佇客廳泡茶開講。雄雄傱入來一隻狗仔，對咧啉的主人一直吠未停，主人足煩的，就徛起來趕狗仔出去外口。
主人返頭拄坐落去，狗仔閣傱入來，咬著主人的衫仔裾向外口拖，主人真懊惱對著狗仔起跤一直共蹔（cam3踹），閣追出去門口卜共伊算數！
即個時陣，突然間煞地動，厝隨塌落去，厝內三個朋友予厝蓋當場矺（teh4壓）死，只賰狗的主人走得離！

絕望自盡的軍用狗 　
足久進前佇聯合報看過一篇文章，是一位計程車司機自責捶心肝的表達。伊用平靜的聲調，寛寛講出一段故事：

 
阮兜蹛踮四樓公寓的第三樓，原本猶未搬入來以前飼著一隻軍用狗，已經飼了幾何年，感情真好。搬來公寓了後，因為飼狗仔的關係煞佮厝邊發生磨擦，而且狗仔的排泄問題也一直使我真頭疼，考慮再三，雖然毋甘，猶是決定共伊「放生」。
驚伊認路走倒轉來，我刁持唯台北載到台中去放生。按呢過了一禮拜外，有一工，聽著厝裡的大門若親像有人一直咧弄門，門拍開一看，想未到是予放捒的迄隻軍用狗，伊煞走轉來，經過長途的跋涉，精神看來已經嬗篤篤，我大著驚，一個心肝干礁起一個念頭，卜安怎好？伊那會閣走轉來！

我隨時共伊縛起來，袋踮布袋內底，拍算即逝將伊載去經過九彎十八斡的宜蘭掞掉。一路上聽著袋仔底軍用狗陣陣淒涼的哀叫聲，毋過我心肝亦是掠袒橫無卜去插伊，繼續開著車，一心一意趕緊到目的地。

毋知啥時陣，袋仔底開始安靜落來，我想，伊可能是傷悿睏去嘍！我心肝才卡放心。當我駛到一個野外的所在，四界無人所到，準備卜放狗出來，落車拍開袋仔一看，軍用狗身軀煞未振動，斟酌一看，狗仔伊咬舌自盡已經無咧喘氣，血流甲規頭殼，死去啊！我規個人怢去，迹呢大隻的狗，煞因為我來死！是我害伊死的！講到遮，司機的目箍紅紅紅含著目屎。

狗仔死了後，我誠後悔，雖然將伊埋葬，嘛定定去共拜祭，毋過良心的譴責亦是真不安，所以我攏會佇開計程車的時，共人客講即個故事，苦勸怹毋通放捒厝裡的狗仔！
即齣悲劇的主角－軍用狗，伊的心情是何等的失望咧，規禮拜的盤山過嶺，唯台中揣轉來厝，路途是赫呢仔遙遠，就愛經過偌濟的困難、危險，伊須要偌濟的勇氣佮氣力一步一步去克服，換做是咱，咱是卜按怎行過即一逝的路途咧，狗仔未曉問路？伊是按怎行過千辛萬苦的路途咧？

當入門到厝，主人扑開門迄一剎那，伊是偌爾仔向望主人的疼惜，意外的歡喜！伊種種的苦楚、煩惱、悿頭，攏佇轉來到厝即一剎那掃甲清清清。卻是，萬萬想未到，伊接著的是隨夆縛起來，隨夆袋踮布袋，隨夆載去卜掞掉，一陣哀叫無人震璺〔cun3 bun7 在乎〕了後，最後伊選擇了自盡，尊嚴而死！