浪子回頭金不換

一清專案被掃烏去台東管訓的大尾鱸鰻阿龍，佇管訓的時，共款對抗滾強大尾，定定夆釘跤銬、禁佇孤人烏牢〈監禁獨居房〉內，按怎凌遲嘛是咬牙齒根毋認輸，是管訓隊上頭疼的人物。

阿龍人懸漢大、拳頭閣飽、講義氣、定定對無正當的管教唱聲（放話），得到內籬仔人人的敬重，伊煞變成管訓隊喝水會堅凍上大尾的英雄。.

歇困日，別人是挨挨陣陣親人來面會，阿龍是毋捌有人來相揣，自伊踏入烏社會走跳浪溜嗹，親情朋友當做伊是兇神惡煞人人閃佮宓，某囝嘛離家出走，厝內只偆年老帶著久年病的老母。更深夜靜，想著個性暴躁，命運做弄變成佚陶人，未當通有孝，心內定定咧滴血。卜寫批予阿母，阿母看無，阿母嘛毋敢提去問人，只有交代細漢仔（手下）三不五時去關照，提寡所費轉去予用。

關一年外，有一工歇困日，伊佇舍房看冊，雄雄戴帽仔來叫有人面會，伊著一驚心內想：「是啥人？」到了會客室，才看著是阿母一跛一跛唯遠遠的辦公大樓行過來，日頭當熱，阿母正手捾物件，左手咧拭汗，會客室離大門的辦公大樓將近300公尺，不止仔遠。佇營房大門入來先愛出入登記，入來辦公大樓閣愛面會登記，大樓到會客室閣愛經過一個真闊的草場，閣四、五個門禁，每的門禁攏有人顧守。

阿母喘怦悴，坐定金金看著囝，講了一句話：「有乖無？」隨提出伊平時仔上愛食的煙腸、果子……。伊的阿母想囝，勤儉一寡所費，唯北部坐夜車，盤幾何逝（趟），到台東參人請計程車到營房……。

阿母是前一站仔佇市仔，聽人咧會講有人去管訓隊，傷歹無聽話夆拍死！自迄日起是焦心扒腹，決定無惜千里路途卜來看囝，雖然身體真荏，看著囝才安心！

阿母參伊開講，講故鄉即一兩年來的變化，講伊的身體一年不如一年………，伊只有笑笑毋知卜講啥貨！

面會的時間到了，阿母愛告辭，心內是毋甘也是真無奈，轉去厝的路閣長拄天，坐車轉車到厝嘛半暝，阿母手搭著囝的肩胛講：「阿母老嘍！毋知閣看汝會著無？」伊佚陶人的目屎煞忍未椆一直輾落來！行踏江湖十外年、來管訓年外，戰過十八銅人，伊毋捌滴過一滴目屎！

歇困一下仔，伊目屎拭拭咧，共阿母講：「汝小等一下！」伊斡身去揣大隊長，拜託大隊長予伊會當揹老母去大門口，親身上老母，大隊長真想未到，因為伊將來毋捌好喙過！大隊長允准伊的請求，派人陪伊做伙去，伊揹著阿母一步一步行出會客室，行過草場，一步一步，兩人攏恬恬，伊含著目屎，希望大門慢請到，會當揹阿母卡久寡，毋捌有孝過，閣予阿母迹遠來看，不孝的囝阿母也是赫疼，阿母風霜慈祥的面容，阿母迄句「阿母老嘍！毋知閣看汝會著無？」重重像雷摃著沉迷不悟浪子的心！

老母即一逝走傱傷過悿頭，轉來了煞破大病，叫是無命閣見囝，佳哉上天保庇，漸漸仔回復。送走了老母，阿龍性情180度轉變，後來被提早釋放。

伊轉來故鄉，收跤洗手淡出江湖，做穡種果子，有孝老母。閣改種有機果子、蔬菜，空課安定一段落，伊去請牽手佮囝仔轉來團圓。落尾蓄田園、趁大錢，厝內一家過著幸福的日子。

老母的慈愛、浪子的孝心雙雙感動天，真是皇天不負苦心人！
2005.12.22.