一念三千  

有一個人，佇畫展看著一幅牡丹圖，非常恰意，就買轉來存囥（放）。轉來厝掛踮壁頂，認真閣加斟酌欣賞，發覺是有夠媠（美麗）。毋過，煞看著三蕊紅帕帕的牡丹，有一蕊才畫一半爾爾，一半無完成，美中不足。伊愈想愈無妥當，牡丹代表「富貴」，三蕊牡丹一蕊缺一角，也就是無完滿，嘛代表「富貴不全」，這若好咧！買即幅圖豈不是歹吉兆！本成跤鬆手弄的心情，雄雄一下囝跋落山崁！

即時，叫電話予賣主講：「汝賣予我的迄幅牡丹，我卜退貨，那有人畫牡丹干礁（只有）畫半蕊爾，即種「富貴不全」的圖我無卜挃！」賣主聽了就應講：「汝會使退貨啊！毋過我佮汝講一個祕密，迄幅圖有真深真好的含意，並不是汝所講的「富貴不全」，反倒轉是「富貴無邊」的意思，如果汝無愛，會使得送還無要緊。」

買畫的人，聽講「富貴無邊」，隨時就喙笑目笑，心情爽甲，應講：「哦！原來是按呢，是即個意思哦！我卜、我卜、我毋換嘍！」

歷史上，宋太祖趙匡胤派大將軍曹斌去攻打四川宜濱縣，卜出發進前，有一個誠有德行的爻人陳摶仙人共曹斌講：「元帥汝是中年得志，毋過晚年會大衰敗，汝愛加做寡善事改變命運。」曹斌到了宜濱縣了後，相戰拍贏，城裡的百姓、對方的兵馬全部攏投降。

當時曹斌的參謀建議，將城門關起來，將所有的百姓、對方的兵卒攏集中做伙，然後斬草除根、放火燒城，以絕後患。曹斌一時想著陳摶仙人的苦勸，一念轉變，毋但無放火燒城，閣下了一道命令：「城裡百姓的生命財產，所有的兵將未使奪取任何一點一滴。對著投降的兵士，未使共怹傷害、侮辱。投降的兵士如果願意留踮遮，就分配一寡田地予伊會當開墾耕作。想卜轉去伊的故鄉，就發寡路費，予伊轉去。」

這個政策一頒布落來，所有宜濱的人對曹斌大元帥攏非常感恩。
迄時陣，宜濱縣的百姓為了紀念曹斌，建了曹公廟來感念伊的恩德。等到曹斌帶領了兵馬轉到朝廷，路上拄著陳摶仙人，陳摶仙人一看足驚疑，就講：「大元帥，汝的面相大大改變嘍，汝晚年的運氣一定非常之好，將來官位一定是一人之下、萬人之上。汝的命運有迹大的改變，一定是做了真大真大的功德。」

後來，曹斌有影官愈做愈大，誠實做到一人之下，萬人之上。而且伊歲壽活到九十外歲，有九個囝，即九個囝攏足將才，為國家立下真大的功勞，囝孫仔攏行著大地步，名聲透（than3）海。

曹斌共人掠厝拆、血流成河，一念化做和諧安樂的淨土，保住濟濟百姓人的性命、財產，甚且安頓怹的生活，化解一場血流成河殺劫，減少了混亂、悲慘的局勢，真是偉大。

一念三千，一念無常，善惡嘛是一念間，天堂地獄亦是一念間。煩惱即菩提，心念一轉，轉向光明，轉向良善，天地開闊，感覺就是無仝，充滿了喜樂、希望。

心念是習性的投影，是平時的善念善行、惡念惡行的累積。善念善行濟，心念發出來的電波大多數是好的。惡念惡行濟，心念發出來的電波大多數是歹的。緣，是卡淺的心念佮行為的感應。

心念是好的，才卡有好的因緣來幫贊、提攜、開破，就會轉向光焱。假使拄著歹因緣，平時的善念無夠強，即一念就予牽對烏暗、牛墟、坑坎落去！所以平時仔每一個念頭、行為攏足要緊，愛謹慎當下的每一刻、每一念，到關鍵時刻，就發揮這一念關鍵的力量。