會講話的鹿仔　

古早印度恒河的岸邊山林內有一隻會講話的鹿仔，兩支角是白雪雪，鹿皮有九種色緻，非常的莊嚴。伊參一隻烏鴉是上好的朋友，親像結拜兄弟。

有一工，一個某甫人無小心淹佇恒河內底，予掣流的溪水一直沖，一時仔浮一下，一下仔沉一下，情況真臨急。迄（彼，那）個人誠無簡單才抈（抱）著一箍水流柴，伊喘著大喟（喘噓噓），叫天叫地：「山神啊！樹神啊！天神啊！龍神啊！為啥乜恁見死不救！請趕緊來救我！」

九色鹿聽著人的喊救，無惜家己的危險，隨時跳落水，游到迄個人的身邊講：「免驚，汝 跁（爬）起來我的尻脊骿（背脊），出力揪我的兩支角，我救汝上岸！」

九色鹿駛奶仔力拚盡磅（竭盡全力），才將迄個人揹上岸，家己已經悿甲會呼雞，袂歕火（精疲力竭）！迄個人上岸了後，非常感激，隨佇鹿仔的身邊行三輾，閣跪咧磕頭講：「佳哉汝的解救，我才會當有活命！我毋知卜按怎報答汝的大恩，請汝允准我做汝的奴隸，逐工擔清氣的水、揣〈找〉幼幼的草侍候汝，一切聽候汝的吩咐！」

鹿仔搖頭拍斷伊的講話：「免按呢！其實嘛無啥乜。我救汝並毋是卜汝報答我，汝若有心就毋通共人講我滯佇遮，若是予人知影，怹會為著卜愛我的皮佮我的角，走來掠（捉）我、刣（殺）我。」

迄個人應講：「一定、一定，汝是我的大恩情人，我絕對袂共人講，真感謝汝！」一擺閣一擺說謝了後才離開。


仝時間，這個國家的王后做了一個奇怪的夢，夢見一隻鹿仔，佇山林水邊咧走跳，鹿的毛有九種色，鹿角白白白，所有的動物攏袂比得伊赫媠。王后真恰意，想卜派人去掠，醒來煞無半項，人像破重病規身軟溢〔ioh4〕溢（軟弱無力），卜死但哼（na7 hainn7 淹淹一息）， 袂起床。

國王誠煩惱，趕緊問伊：「汝按怎袂起床，身軀佗咧無爽快，我請國醫來共汝看！」

王后講：「昨暝夢著一隻真媠真媠的鹿仔，伊的毛有九色，兩支角白甲發金。我真想卜用伊的皮來做我的椅眥（cu7椅墊）仔，用伊的角做我拂塵的柄。請汝幫我揣迄隻鹿仔，若揣無，我一定會病死。」

體貼的國王，為著心愛的王后，不得不接受伊的要求，就答應講：「好！我身為一國之君，卜揣一隻鹿仔，有啥困難，有啥乜得袂著的！」隨下了一道命令：「若是有人會當掠著九色鹿，我賞賜伊一半的江山，閤一大缽淀淀的黃金、一大缽淀淀的白銀！」

揣九色鹿的消息一發布，全國轟動，議論紛紛，毋過並無人看過九色鹿，嘛無人知影九色鹿的影跡。有！干礁有一個人，誰呢？就是迄個予九色鹿解救的人。這個人聽著消息，起初小可躊躇，後來心念一轉，心肝掠坦橫，心內想：「這聲行著卯時運，福氣到毋知，咱國干礁我知影迄隻九色鹿的下落，正港是上天賜予我的好機會，我來去領賞，我的一生榮華富貴就享袂盡啊。鹿仔是畜牲，我是人，鹿仔的死活共我有啥干礙！」

無偌久，伊來裂（lih8撕）告示，閣向官府的人講：「我知影迄隻鹿仔的所在。」官員將伊帶去見國王。國王一聽，滿心歡喜，閣再強調講：「汝放心，汝若真正掠著迄隻九色鹿，我會賞賜我一半的江山，佮予汝一大缽淀淀的黃金、一大缽淀淀的白銀！」

迄個人暗歡喜，就應講：「我一定將九色鹿仔掠轉來！」講嘛奇怪，迄個人的喙酺（嘴巴）佮身軀雄雄（突然）生甲足濟癩 粒仔（癩瘡）。伊閣講：「毋過，這隻鹿仔雖是動物，力量非常大，若無動用兵馬來圍掠，恐驚無簡單掠到手。」

有影，國王親自率領大軍，綴著迄個人到了恒河邊。這時陣，鹿仔的好朋友烏鴉，對樹仔頂看著一陣一陣的官兵圍倚來，預料怹是卜來掠鹿的，隨時大聲叫、大聲喝：「緊走！緊走！人來嘍！」鹿仔佇樹仔跤睏甲當落眠，一點仔攏無知覺。烏鴉連紲喝聲：「鹿仔兄！趕緊起來！緊走！國王 官兵來掠汝啦！」

真正是急死人，鹿仔猶是睏甲毋知人，烏鴉是急甲規身汗，唯樹仔頂傱（cong5奔走）落來，對鹿仔的耳空邊大聲咻。

鹿仔一精神，真著驚， 起跤想卜走，走這爿，走迄爿，國王的兵馬老早已經團團圍住，連卜逃走，嘛揣無空縫。鹿仔心內知影，走無路啊，就鎮靜一步一步行向前，到國王的面前，國王身邊的衛士，馬上揪起弓箭準備射殺鹿仔，國王出聲阻止：「且慢，這隻鹿真有靈性，佮其他動物無相仝，無的確是天神變的。」

鹿仔來到國王面前講：「請問國王，誰 汝來遮的？」國王指著迄個人講：「是喙酺生癩 粒仔的人共我講汝蹛佇遮。」（註：癩 粒仔，癩瘡）

鹿仔詳細看迄個人，忍袂椆（忍不住）流目屎講：「大王！前無偌久，伊沉咧水底沐沐泅，險險仔予水淹死，是我無惜危險救伊上岸。伊為了卜報答我，閣講卜做我的奴隸。我拒絕伊，我講免伊報答，干礁愛伊毋通將我蹛的所在洩漏去。人實在是無情無義，我揹伊上岸，卡輸揹一箍水流柴。」

國王聽了，誠感動嘛誠見笑，講：「我的百姓實在真毋捌道理。」隨斡頭過，大聲訓示迄個人：「汝無應當按呢恩將仇報，汝真是一個無恥的小人！」

鹿仔予國王放走，迄個不義的人予國王責罰，永遠做奴隸，逐工干礁會當食一頓。並將這層代誌向全國宣布，並且下令任何人不得來這個所在打獵，攪擾怹。

從此以後，濟濟（很多很多）的鹿仔攏來到遮生活，怹袂閣去食田裡種作的物件，全國豐收，無瘟疫，也無災厄。

心念是無常的，空性的，變化無常的，時常隨綴（tue3跟隨）著迄當時的情境起起落落轉變。當咱指責迄個忘恩負義的人，毋過咱若面對世事的變化，面對人共咱呵咾、諷刺、誹謗、巴結，遇著利益當前、失意失敗、事事不順、事事完滿，咱又閣按怎安住心念，甭起貪、甭起怨煩，閣保持當初迄分單純的心咧！

忘恩背義的人，俗語形容做「落水叫三界，上水叫無代」，三界是指天官、地官、水官的三界公。比喩「鯽仔魚食水，喙下斗過」，過了時，煞了代，船過水無痕，別人的人情義理攏袂記了了。袂記了了已經誠離譜，卻是反倒轉「飼狗吠主人」、「豆油分汝搵，碟仔捧咧走」、「報伊食屎，連尻川煞咬去」，實在是傷超過，豬狗不如！