受氣的時陣

受氣的時陣，愛忍，能忍自安。忍一時，風平浪靜；退一步，天地開闊。忍得一時之氣，消得百日之憂，俗語嘛教咱講：「忍氣招財，激氣相刣。人情留一線，日後好相看。好歹在心內，喙唇皮仔相款待。動喙不動手，動手爛朽朽！」

受氣的時陣，面漚面臭（沉著臉），講話三角六尖，啥乜死骨頭的歹聽話嘛罵出來，結局曲痀的跋落海－灣泅（冤仇）。加結一個冤仇，加徛（立）一堵石墻，人際關係拍歹〔phainn2〕，傷害著別人，嘛害著家己。

一受氣，失理智，心狂火著擋袂椆，怒將心上起，惡向膽邊生，像炸彈暴炸，一失手起粗殘，做出莽撞的代誌，爽一時後悔一世人。受氣，嘛叫做「起歹面」、「心火著」。人若受氣，親像予黑暗勘（kham3）椆咧，看袂清好歹，分袂清方向，會行毋著路，做毋著空課。相罵、相拍、相刣，甚至發生戰爭，攏是因為受氣。親像驚天動地的美國911恐佈事件，就是對美國人的不滿、受氣引起的。

提一個故事，咱就知影受氣的後果不堪。
一個水窟仔，洘旱真久，攏凋涸涸啊，窟仔底有一隻龜，喙凋甲軟翱〔ko5〕落趖（軟趴趴）強欲死死昏昏去。有兩隻野雁路過，看伊可憐，設法解救伊，就咬一截樹枝予龜咬咧中央，兩隻野雁咬仃樹枝兩爿，欲 伊離開，揣有水的所在。
兩隻野雁千叮嚀萬交代：「龜仔兄，汝愛咬予絚〔an5緊密〕，飛佇半空中，毋管發生啥乜代誌，毋通開喙，毋通放。」

野雁飛過水窟仔，飛過田園，飛來到田庄，拄著一群囡仔，看著天空頂，忽然大聲喝：「大家緊來看喔！一隻龜去予兩隻野雁咬去啊！」龜一聽，面一捋（luah8），真受氣，「是咧講啥乜痟話！我才毋是予野雁咬去，是野雁欲 我去有水的所在！」規大陣囡仔指著龜，笑甲是東倒西歪，龜內心真礙虐，就開喙訐譙（kan3 kiau7叫罵）：「死囡仔脯！恁父來揣汝算數….！」喙一開，唯天頂跋落來，摔對山崁邊，是生是活毋知枝！

西洋人有一句出名的話講：「受氣是提別人的錯誤來責罰家己。」古早藥冊《黃帝內經》嘛有講：「怒，傷肝。」若是別人存心欲激汝受氣，親像挖一个屎礐（廁所）喝講：「跳阿！跳阿！」千萬毋當中計，真正糊裏糊塗跳落去。人對咱，有時是無心的，有時講了就煞，毋通懊惱想袂開，時時閣摕（拿來）來魯氣，真正是戇大豬！

受氣，血壓衝懸，心臟撲撲筅，愛細膩喔！氣死驗無傷，氣歹身體無藥醫。拄著袂合意，難免受氣，毋過愛知影按怎排解，當受氣小吞忍咧，莫（bang2）出喙、莫動手，先嗍（吸）一个大氣，逗逗仔吐氣，一擺、兩擺、三擺，怒氣就走夠樹仔尾溜去！想真，如果火燒厝，上要緊是轉來厝拍火，毋是去迮（追逐）放火的人。當咧受氣的時陣，好好仔觀照家己的受氣，如果閣顧參人理論，想欲報復，就親像去迮放火的人共款。

受氣袂當解決代誌，更加予代誌舞甲閣卡複雜、歹處理。受氣，像狗鍊仔鍊椆咧，袂自在、袂輕鬆、袂歡喜、袂平安。拄著受氣，免相計較，敢講：「予痟狗咬著，愛閣覆（phak4俯下）落去倒跤狗一喙？」（2005.06.05.定稿）