佛陀洗過跤，將水倒掉，刁意故留一寡佇跤桶內，佛陀就吩咐羅睺羅講：「羅睺羅！汝將跤桶偆的水啉落去。」

羅睺羅雄雄驚一趒，湡一下才回答講：「佛陀！洗過跤的水無清氣未使啉！」
佛陀講：「好！將水倒掉。」

羅睺羅將水摒掞捒（丟棄），佛陀閣講：「汝就用即跤桶仔去貯（裝）飯菜！」
羅睺羅真為難，就講：「佛陀！洗過跤的桶仔真垃圾（髒），未使得貯飯菜！」
佛陀聽完，無張無持將桶仔一踢，桶仔叮叮噹當，滾幾落輾才停落來，羅睺羅大驚失色，毋知發生啥代誌，佛陀是按怎那會赫受氣。

佛陀問講：「汝是毋是驚桶仔踢歹去！」

羅睺羅講：「不是啦！桶仔已經真舊卜害啊，若歹去才買新的！」

佛陀講：「羅睺羅！汝愛知，講白賊話，汝親像洗跤水共款無清氣，無人卜挃（要）。講白賊話，汝就親像驚人的桶仔共款，未當囥好的物件落去。講白賊話，就親像無路用的物件，踢歹去嘛無要緊！」

羅睺羅聽了非常慚愧，隨時向佛陀頂禮懺悔：「慈悲的佛陀！汝的教示弟子知影，打妄語是無應該，打妄語是我的過失，帶予家己佮濟濟的人苦惱，我未閣講白賊話，打妄語啊！」

佛陀，露出歡喜的笑容。 
羅睺羅後來道業成就，證著阿羅漢果，成為佛陀十大弟子其中的密行第一。