字體:小 中 大 | |
|
|
2006/01/22 20:38:09瀏覽251|回應0|推薦2 | |
跤 桶 佛陀出家六年後成正覺,八年後轉來故鄉迦毗羅衛國,一方面為了報恩,轉來見伊的父親淨飯王佮自細漢育飼伊長大的姨母摩訶波闍波提夫人;一方面為了度眾。即一畷(ㄗㄨㄚˊ一趟)祖國之行,連紲度化了提婆達多、阿那律、跋提、婆娑等五位王子出家,佛陀的孤囝羅睺羅、佛陀的叔伯小弟阿難後來嘛攏出家。 淨飯王別世了後,摩訶夫人帶領宮女佮國內500個女眾前來皈依、出家。無偌久俗家的妻子耶輪陀羅嘛出家。 初出家的羅睺羅,年紀輕輕才十七、八歲,猶閣真囡仔性,愛創治人。若拄著有人問佛陀去處,伊就滾耍笑烏白報,佛若是去竹林精舍,伊就講佛陀去佇鷲峰山啊,予信眾闖來闖去,走甲拆腿,閣揣無佛陀,羅睺羅看甲真心適。 佛陀洗過跤,將水倒掉,刁意故留一寡佇跤桶內,佛陀就吩咐羅睺羅講:「羅睺羅!汝將跤桶偆的水啉落去。」 羅睺羅雄雄驚一趒,湡一下才回答講:「佛陀!洗過跤的水無清氣未使啉!」 羅睺羅將水摒掞捒(丟棄),佛陀閣講:「汝就用即跤桶仔去貯(裝)飯菜!」 佛陀問講:「汝是毋是驚桶仔踢歹去!」 羅睺羅講:「不是啦!桶仔已經真舊卜害啊,若歹去才買新的!」 佛陀講:「羅睺羅!汝愛知,講白賊話,汝親像洗跤水共款無清氣,無人卜挃(要)。講白賊話,汝就親像驚人的桶仔共款,未當囥好的物件落去。講白賊話,就親像無路用的物件,踢歹去嘛無要緊!」 羅睺羅聽了非常慚愧,隨時向佛陀頂禮懺悔:「慈悲的佛陀!汝的教示弟子知影,打妄語是無應該,打妄語是我的過失,帶予家己佮濟濟的人苦惱,我未閣講白賊話,打妄語啊!」 佛陀,露出歡喜的笑容。 |
|
( 創作|散文 ) |