2010-07-30--5656

　　眠眠，阮又鼻著阿爸的滷肉芳，看著阿爸置灶跤煮飯的的身影；
　　阿爸，當年細漢的阮毋知您失去伴侶的心酸，只知歡歡喜喜吃著您煮的滷肉飯。

　　眠眠，阮又看著故鄉的彼條溪，又看著阿爸坐置溪頂的彼條橋；
　　阿爸，溪邊敢是印著往日阿母洗衫的形影？溪水輕輕流敢是阿母溫柔的話語？

　　黃昏的天邊，紅紅的日頭染到滿天紅，當年的阮無了解阿爸坐置橋頂的背影寫著孤單佮寂寞；
　　星光月亮的晚暝，月娘照著坐置窗阿口的阿爸，還少歲的阮如何明白阿爸身兼阿母職務飼子成人的的苦楚佮無奈。　

　　今暝的夢中，失去了阿爸的身影，阮坐置故鄉的溪邊看月娘置天邊。

　　註解..
　　（1〉眠眠→朦朧中（2）芳→香（3）灶跤→廚房（4）坐置ㄉㄧˊ→坐在
　　（5）星光月亮→這裡的月亮不唸月娘，應該唸月ㄌㄧㄤˋ意思是說有月亮光的晚上

　　◎尾話：阿母過身後，阮阿爸的手路菜就是滷肉，尤其是魯膀蹄，南部講腳褲〈現此時一般亦攏講腳褲，只有在地的彰化人才還有咧講膀蹄〉。