電子批箱內攏會收著真濟轉批，讀轉批我第一選擇是先看檔案大小，我攏選上小的檔案先看起；遐些大檔案的轉批，有可能就一直囥置電子批箱不知何時才會去看；無辦法一來因為真浪費時間，二來太傷目睭；檔案小的轉批差不多攏是文章，有時陣真正有寶當撿呢！

　　前幾工在一封轉批看著按爾一句話『真正的好朋友，作夥有講眛完的話题，但就算無講話，也眛感到無自在』，這句話予阮想起尪婿參伊一位交情已超過三十冬的老朋友，目前的相處方式。

　　這位朋友一個禮拜來阮兜三四擺，每次來坐固定的位置、用固定的杯子（杯子是伊家己帶來阮兜囥的，伊講較大杯）；倆個郎拍過招呼了後朋友開始飲茶看報紙，阮尪先處理完伊業務上的載誌，就開始倆個郎相對坐，一兩個點鐘過去倆郎無任何話題。這種情形看在我的眼內有淡薄阿好笑，因為迭迭攏是這種情形。但老朋友就是老朋友，就算是無聲的世界，這位朋友只要毋是上日時班一定來阮兜報到，阮尪若一連三工無任何消息又不見老朋友來厝裡坐，就掛心老朋友是毋是身體有按怎（因為心臟曾出過毛病）。

　　『真正的好朋友，作夥有講眛完的話题，但就算無講話，也眛感到無自在』這句話在阮尪與朋友身上得到印證；我將這句話唸予阮尪聽，伊聽了後雖然同意也忍不住感覺好笑。