2010-07-05-圖文-5656

　
　　固定隔一段日子就愛參尪婿去予醫生巡龍骨，看突出變形的所在恢復了是毋是有正常；醫生知我有咧寫台語文，就佮（1）我分享伊最近聽著的一句台語，伊講伊已經有二三十年無聽過這句話，阿我是從來攏無聽過。

　　醫生講：「今日我去買菜籽，想欲置（2）厝前烏白（3）種來家己吃，因為買無濟（4），我問攏總外濟錢（5）的時，頭家講：『畚土豆堆呀拿拿就好啦，阿無外濟菜籽。』」醫生問我講敢知「畚土豆堆呀」是什麼意思；坦白講我並毋知悉，但是我掠（6）醫生參頭家的對話當中猜測，就講：「凊采（7）算算咧，敢是？」醫生以為我有聽過這句話，講我真是一個本土女性。

　　其實有真濟原味的台語或俗語漸漸消失，但是洶洶一聽就聽知意思，當然亦有涵義較深，或是有故事來源的就需要解釋才有法度明白其中深意。像我的尪婿迭迭（8）置朋友問伊講近來生意好麼？尪婿時常應一句話講：「牡丹阿寫批，講慘的加落掛！」；像這句話就有故事來源，毋知朋友你敢知？我記智（9）我曾經寫過這句話。（這句話是真慘的意思）

　　　　註解..
　　　　（1）佮→和（2）想欲置→想要在（3）烏白→黑白（4）買無濟→買不多
　　　　（5）攏總外濟錢→全部多少錢（6）掠→抓（7）凊采→隨便
　　　　（8）迭迭→常常（9）記智→記得　　

　　　　　　　　　　　　　　　　電子報首頁