【台文】

因為我用台語寫文章已經寫幾何年，所以，若用華語寫，寫袂蓋順。即馬，驚仔各位看台語文傷過生疏，致使無愛看落去，我就先用台語寫一遍，才閣用華語翻出來，兩種語言的文章總貼，希望各位師兄師姊指導！

真無簡單撨時間去到豐原參弘願法眷結緣，煞佇未到位的火車底，人就開始眩，想欲坐返頭車轉來，閣想講，目的地是一間藥局，到時隨買藥仔來食就安心。

落火車坐計乘車到位，無表明身份就共藥師講：我頭咧眩，共恁買藥仔。

包藥仔的時陣，蓮友陸陸續續到位，有人問講：抑未人來哦？我足想欲應講：我到位矣。

藥仔接過手，食落腹我才共謝居士講：我來自斗六，是佇網站熟悉詹律師，知影今仔日這有讀冊會，所以我來。

讀冊會佇藥局的地下室，佈置徦真清幽，掛佇壁頂彼張游老師的相片我佇二姐遐看過，二姐蹛內壢仔，伊是帶我入這咧法門的人，聽講彼張相片是法親會時翕的。地下室四周圍的壁嘛有老師的筆墨。雖然是初次見面，但是與會的法眷每一個人的面容，我看著攏感覺足面熟的；敢是佗一世，咱捌同齊鬥陣聽過佛法？抑是將弘願的思想讀入心，自然就會有共款的「磁場」？

讀冊會進行方式，這擺是「正信念佛偈」第69講（若有記毋著，請諸位指正）的心得報告。哇！每一位師兄師姊麥克攏舉著真在，報告的內容真少有重複性閣真精彩，我本成疑問，事先敢有分配每一個人無共段落？後來詹律師解答這咧疑問，無限定報告的內容範圍。實在真無簡單，我深深感佩慈佛的力量無邊、佮欽服每一位法眷的用心向佛。

時間倚五點時，我頭又閣眩起來，拜託坐佇我邊仔的游師姐去請教謝藥師，敢會使閣食一包藥仔？謝藥師提另外一種藥仔予我食落。這款眩的症頭若壓無落去，會像超級大風颱按呢，天地滾絞，像咧坐雲霄飛車共款，佇抑會行時，量苦緊來離開轉來去。

謝藥師開車游師姐陪伴載我去火車頭。勞師動眾實在真歹勢。佇火車頂，藥效發作流歸身軀汗，人就睏去矣。睏一醒，頭眩的感覺減輕真濟。感謝謝居士、感謝逐家！

我想，我是無方便定定去豐原參加讀冊會，佳哉這嘛網路真利便，我打字嘛算真緊，我就利用網路來參逐家聯絡。

我是按怎入來弘願法門的？講起來話頭長，我二姐跟隨老師聽經真濟年，有一擺二姐提幾何塊「弘願法門」的錄音帶欲予我聽，我起先干單聽著老師講：法門〔門這咧音老師讀做梅〕，的確是因緣未到，我想講聽無，就無愛聽，錄音帶囥咧閒、人、心佇凡間咧無閒。

我咧想，慈佛佇我抑未入弘願這咧法門時，伊就處處照護我、一直咧等我入門。按怎講咧：我講幾項仔代誌予恁知。

我國校仔四年離開故鄉去一間為肢障的學生設的仁愛學校蹛學舍。佇遐禮拜時一位沈阿姨會來傳福音，伊講上帝會解決咱所有的代誌，咱若有心事，共上帝講，伊會聽著。我感覺足幸福的，天頂有一位上帝會解決咱所有的一切。信上帝一站仔時日了後，有一工我穿的鐵鞋仔斷去，彼雙鐵鞋是我欲去學校的時，阿母招會仔替我買的，鐵鞋斷去，又閣愛開錢、我行路嘛無方便。後暗欲睏，我想著沈阿姨講的話，就足誠心向上帝祈禱：上帝啊！我的鐵鞋壞去矣，請你佇盈暗來解決我這咧問題。我對上帝有信心，明仔載起床．一定會有一雙好好的鐵鞋。

第二工透早鐵鞋提來欲穿，抑是斷去的鐵鞋。自彼擺了後，我無愛相信上帝，沈阿姨來的時，我就假仙睏去，無閣去聽伊講的福音。因為上帝無影會解決咱所有的問題。（這是頭一次我接近宗教，雖然佇這失望，我想，這時陣佛就咧等我矣）

結婚了後，囡仔猶真細漢，我去剪頭鬃伊綴我去，佇頭鬃店邊仔耍。頭家娘一面幫我剪頭鬃，一面問我有信仰無，我講無。伊講我的跤會袂行，一定是前世做真濟痞代誌，伊講伊是一貫道，欲帶我去聽道，會渡我變無罪。伊看我的囡仔佇邊仔耍，共我講我囡仔的罪閣較重，若無哪會有兩個跛跤的序大（阮翁嘛殘障），我聽伊按呢講足毋甘，若有罪我來擔就好，哪通連累囡仔。伊講彼暗怹佇寺院裡有活動，像我這種〔破相〕的人怹是無欲予阮倚近，但是伊肯向怹的神替我求．報予我地址……伊講我囡仔有罪，我想欲向伊的神求，請伊赦免阮囡仔的罪，我食偌濟苦攏無要緊。彼暗我佇伊報我的所在找足久，就是找無伊講的所在（即馬想起來，一定是慈佛毋甘我墮落，所以予我找無彼間寺院）

閣有一擺全家伙仔欲出門，一個人咧分傳單，看著我參翁婿攏跛跤，共我講：恁愛較捷佈施，才會解脫深重的罪孽。我共彼張宣傳單囥唯皮包仔底。去到菜市仔欲買水果的時，彼張單落出來，賣水果的頭家抾起來予我，因為參伊有熟悉，就共伊講拄才搪著人講阮愛佈施的代誌。頭家好心報我入伊咧信的教，講信彼種教，會解決咱經濟苦，我有去參加怹的聚會，是用日語唸「南無妙法蓮華經」，我就貪嘛，想講念經若會解決經濟苦，認真念一下，免咧做徦這辛苦。

後來，一擺阮這一層大車禍，受害者佇西螺受傷，予人拖去山頂打死去。一位唸「南無妙法蓮華經」（我毋知影奚是啥教）的朋友打電話予我，共我講夆打死彼個人的老母，唸二十外年的南無妙法蓮華經，厝裡連一尊怹的御本尊的相攏無供養，才會出代誌。

我聽著全身軀冷起來，老母信教信無好會拖累囝？這款的宗教我會驚，此後，我就退出怹的聚會。

宗教，應該是予人感覺安心、歡喜、無恐怖、無勉強、無威脅的氣味，是按怎我搪著的，總是予我感覺無爽快。

有一年我的朋友提一盒淨空法師的演講cd予我聽，我聽徦足入迷，共二姐展講阮朋友送我的講經ｃｄ足好聽。

二姐應我講：游老師的錄音帶閣較好聽…..

真的嗎？我去找二姐幾何年前予我的錄音帶出來聽。哇！真的呢，我知影老師講的〔法梅〕就是法門啦。一擺聽無、聽兩擺，聽十擺嘛無敗害。

彼幾塊聽了，我就共二姐討欲聽較濟咧。後來二姐提予我老師講的「安心決定鈔」、「觀無量壽經」、……會記得的是這，愈聽愈有味。嘛愈來愈知影這咧法門是啥乜。後來閣聽「楞嚴經」。聽到楞嚴經的時，感覺足深的，一塊錄音帶聽幾何遍，了解的抑是有限，這是我需要閣認真的部份。

家己聽經，二姐若有機會會共我講一寡仔弘願法門的種種，二姐蹛內壢仔，見面的時間有限，我若有問題會佇電話中參伊講，伊信徦真稠心，伊定定會去參人聚會，我嘛足想欲找一個有弘願法門的所在，鬥陣讀經。老師毋是講過：念佛無蓮友，就像厝裡無掃帚。

去一畷豐原，我知影這條路是無好行的，一來我本身行動就無方便、二來身體略略仔較悿就食袂消，會眩。毋知愛講我福氣較薄，予種種的障礙擋咧無才調參逐家鬥陣、抑是愛講我真有福氣，會當有機會熟悉恁；雖然只是一面之緣，我想，這咧因緣的產生，一定是我求佛幾何年所賜的！感恩慈佛、感恩逐家！