目睭看著 這五分地

曾經種稻 種瓜 種果子

也曾經發生過 一寡代誌

思想起 

囝仔時代記智

就有

收成兮歡喜

也有

苦澀兮滋味

閣有阿嬤 捏大腿

疼疼 趕走愛睏神 

挽拔仔 透早時

若無袂赴 阮阿爸去賣早市…

 迄工下晡　
車騎到 曾經是阮兜的園
即馬賣別人佇種作

當初卜捨棄 這五分地 阿爸阿母心肝上疼
又想 好佳哉　有這地好抽退 保存家庭圓滿
兄哥則有 東山再起的機會
短短幾年伊也將　敗去錢 擱賺倒轉來
買了兩棟厝．．．
兩老仔也欣慰 會凍有這款結果
千年田 八百主
田園厝地 誠實無永久的主人