想無話通安慰--伊

佇過年前才熟似一位阿媽級的老朋友，伊加我四歲，看伊的個性誠樂暢、隨和閣慈悲好善，真好鬥陣，足有人緣的。

  過年後，二月的時雄雄聽講伊人無啥爽快，緊去共看覓的，伊講有去病院門診過矣，醫生安排伊愛好好仔做一下仔健康檢查。伊共阮講伊心內真煩惱，驚講毋知身體出啥問題無？阮共鼓勵講放心予醫生好好仔檢查，無按怎上好，若有按怎醫生才會當對症治療，拄著矣愛勇敢過關。

一禮拜後，伊的後生、新婦佮小妹攏佇醫生的說明後知影檢查的結果，互相提醒毋通予伊知影。in後生閣安排伊去另外一間大病院做切片檢查，當醫生宣布檢查結果後，後生佮新婦忍袂牢攏哭出聲，醫生講：腰尺癌第三期，已移轉到肺部，只賰三個月的時間，若接受化療，會當閣活咧一年。伊家己知影了後嘛接載袂牢矣！

禍拍對天窗落來，無人有法度接受，阮的心情有夠䆀的，規工心不安，雖然講人生在世難免有災厄，今考這啥題？無錯，咱人攏知影家己有一工會死去，毋過是佗一工咱攏毋知影，所以會當無事過日，啊伊煞予醫生共講明死期，講毋驚是騙人的，日子一工一工逼近，哪有袂驚惶的道理？

平時阮嘛真𠢕苦勸--人，這聲若啞口咧，暝日就是咧想無步通鼓勵伊，想無話通安慰--伊，……。

                                                      minda 2020.4.17

附註：

1、熟似(si̍k-sāi)：熟識、認識。

2、雄雄(hiông-hiông)：突然、猛然、一時間。

3、無按怎(bô án-tsuánn/nuá)：沒有怎樣。

4、拄著(tú-tio̍h)：碰到、遭遇。

5、後生(hāu-senn/sinn)：兒子。

6、新婦(sin-pū)：兒媳婦、媳婦。

7、毋通(m̄-thang)：不可以、不要。

8、接載袂牢矣(tsih-tsài bē/buē-tiâu--ah)：支持、支撐不住了。

9、腰尺(io-tshioh)：胰臟。

10、賰(tshun)：剩餘。

11、䆀(bái)：惡劣、糟糕。 

12、𠢕(gâu)：能幹、有本事。

13、苦勸(khóo-khǹg)：苦諫。極力規勸，苦口婆心的勸告。

14、啞口(é-káu)：啞巴。