性命的花蕊

月ㄨ阿姨定定來參媽媽坐,有一工伊講想欲拜託我去教怹查某子彈琴,印象內底坐輪椅的人,真濟攏手特別巧,照約束的時間去怹兜,想袂到伊的囝仔是腦性麻痺患者,雙手攏挽搣(註1),無法度控制,唯一會用哩的著是正腳(註2)的第二支趾頭仔,只好共(註3)電子琴囥佇塗腳,用腳趾頭仔彈,而且淑絮講的話大部份嘛愛靠怹媽媽翻譯才聽有,這節課對阮兩個攏是真大的挑戰。

私底下共月ㄨ阿姨講:淑絮的狀況有較特別,無一定有法度彈奏,可能著當作認捌音樂的課程,伊講:無要緊!莫予伊無聊著好!彼站(註4)淑絮的父母逐工陪伊去讀冊,三個人國中拄(註5)畢業,好學的精神予人真感動。

這濟冬來學生來來去去有一、兩百個,考椆(註6)音樂班的嘛袂少,毋過離開教室攏真少擱聯絡,一半個會敲電話算是有情的。兩冬前(2009年)淑絮得著周大觀文教基金會全球熱愛生命獎章,擱幫助伊出一本冊:《面向陽光—向日葵天使許淑絮傳奇》,其中有一篇寫伊學電子琴的過程,共當時鼓勵伊的話攏寫佇內底:足聰明擱足認真,比健全的學生較好教!予伊真有信心,原來淑絮發現伊的腳趾頭仔毋但會彈琴,嘛會拍電腦,從此開啟伊另外一個無限的人生。

性命的花蕊當時欲開?欲開佇佗?有時陣真歹預料,搰力耕耘的林園,無一定有收成,特殊的機緣,顛倒開出美麗的花蕊。淑絮已經唯虎科大二技企管系畢業,希望伊照心願繼續升學,鼓勵擱較濟人珍惜上蒼的恩賜。

註1：挽搣，蜷曲的意思。

       註2：右腳

       註3：把

       註4：那一陣子

         註5：剛剛

         註6：考上