新年的願望

希望台灣的囝仔出國展覽抑是比賽,袂擱再予人霸凌;台灣袂因為某一個條約、某一個密會,變作他國的領土;希望台灣人毋通刀上舐蜜,提環境換經濟,甚至提主權換經濟。
    希望台灣有一套超越政黨的國土規劃,下一代的台灣人,毋免承擔生態浩劫。

 希望司法像一面無分別心的鏡,白頭毛照鏡,是白頭毛,烏頭毛照鏡,是烏頭毛,司法官佮正義女神同款:掩著伊的雙眼,才袂看著被審者的種族、身份、政黨…,公平審判了後,袂予大環境秋後算帳。 
    希望每一工看的是真正的新聞,毋是政府買的「業配」,希望認真拍拚的人袂被醜化、被迫害,袂擱再孤單。

希望眾生深信因果,瞭解惱害別人,就是惱害家己。